ٹی ٹوئنٹی ورلڈ کپ میں امریکا اور بھارت سے ذلت آمیز شکست کے بعد بالآخر پاکستان نے کینیڈا کے خلاف اپنا گروپ میچ جیت لیا۔
نیویارک کے نساؤ کاؤنتی کرکٹ اسٹیڈیم میں پاکستان نے ٹاس جیت کر کینیڈا کو پہلے بیٹنگ کی دعوت دی۔
کینیڈا نے مقررہ 20 اوورز میں 7 وکٹوں کے نقصان پر صرف 106 رنز بنائے۔ پاکستان نے مطلوبہ ہدف 3 وکٹوں کے نقصان پر حاصل کرلیا۔
کینیڈا کی اننگ
پاکستان کو پہلی کامیابی اس وقت ملی جب 20 کے مجموعی اسکور پر نیونیت دہلیوال 4 رنز بناکر آؤٹ ہوگئے۔ 29 کے مجموعی اسکور پر پرگت سنگھ 2 رنز بناکر شاہین آفریدی کی گیند پر کیچ آؤٹ ہوگئے۔کینیڈا کی تیسری وکٹ 43 رنز پر گری، نیکولس کیرٹون ایک رن کے ذاتی اسکور پر رن آؤٹ ہوئے۔
کینیڈا کی وکٹیں گرنے کا سلسلہ تیز ہوا تو چوتھی اور پانچویں وکٹ 54 رنز پر ہی گرگئیں، یہ دونوں وکٹیں حارث رؤف کے حصے میں آئیں۔
اس دوران آرون جانسن نے 41 گیندوں کی مدد سے اپنی شاندار نصف سنچری مکمل کی۔ لیکن وہ جلد ہی 52 کے اسکور پر نسیم شاہ کی گیند پر کلین بولڈ ہوگئے۔ وہ کینیڈا کے آؤٹ ہونے والے چھٹے بیٹر تھے۔
87 کے مجموعے پر محمد عامر نے پاکستان کو 7ویں کامیابی دلوائی۔ انہوں نے کینیڈین کپتان سعد بن ظفر کو کیچ آؤٹ کروایا۔ سعد نے 10 رنز بنائے تھے۔کینیڈا نے اس کے بعد مزید تو کوئی وکٹ نہیں گنوائی لیکن مقررہ 20 اوورز میں صرف 106 رنز بناسکی۔
پاکستان کی بیٹنگ
108 رنز کے تعاقب میں پاکستان کی جانب سے صائم ایوب اور محمد رضوان میدان میں اترے۔
دونوں بیٹرز تسلی بخش اوپننگ پارٹنر شپ بنانے میں ناکام رہے جب صائم ایوب دلون ہیلیگر کی بال پر کیچ آؤٹ ہوئے۔
صائم ایوب کے بعد کپتان بابر اعظم بیٹنگ کے لیے آئے۔ دونوں نے 63 رنز کی شراکت قائم کی۔ بابر اعظم جو 33 بولز پر 33 رنز کی اننگز کھیل کر ہیلیگر کی بال پر کیچ آؤٹ ہوئے۔
بابر کے بعد فخر زمان میدان میں اترے۔ فخر صرف 4 رنز بناپائے۔ ان کے بعد عثمان خان آئے ۔دونوں نے پاکستان کو فتح دلائی۔
