نیوزی لینڈ کے خلاف ٹی 20 سیریز میں شکست کے بعد اب قومی ٹیم کا ون ڈے فارمیٹ میں بھی برا حال ہے۔ پاکستان پہلا میچ 73 رنز سے ہار گیا ہے۔
نیپیر میں کھیلے گئے میچ میں پاکستان نے نیوزی لینڈ کے خلاف 3 میچز پر مشتمل ون ڈے سیریز کے پہلے میچ میں ٹاس جیت کر پہلے فیلڈنگ کا فیصلہ کیا۔ نیوزی لینڈ نے مقررہ 50 اوورز میں 9 وکٹوں کے نقصان پر 344 رنز بنائے جب کہ پاکستان ٹیم 271 رنز پر آل آؤٹ ہوگئی ۔
محمد عباس کا پاکستان کے خلاف ریکارڈ
ابتدا میں ایسا لگتا تھا کہ پاکستان کا پہلے فیلڈنگ کا فیصلہ درست ہے۔ نیوزی لینڈ کی ابتدائی 3 وکٹیں 50 رنز پر گریں۔ ول ینگ 1، نک کیلی 15 اور ہینری نکلز 11 رنز بنا کر آؤٹ ہوئے۔اس موقع پر ڈیرل مچل اور مارک چیپمین نے ذمہ درانہ بیٹنگ کی اور 199 رنز کی شراکت داری قائم کی۔
مارک چیپمین نے 132 رنز کی اننگز کھیلی جس میں 13 چوکے اور 6 چھکے شامل تھے جبکہ ڈیرل مچل 76 رنز بنا کر آؤٹ ہوئے۔
اس کے علاوہ ڈیبیو کرنے والے محمد عباس نے 26 گیندوں پر 52 برق رفتار رنز اسکور کیے، جس میں 3 چھکے اور 3 چوکے شامل تھے۔
نیوزی لینڈ نے مقررہ 50 اوورز میں 9 وکٹوں کے نقصان پر 344 رنز بنائے۔ عرفان خان نے 3 وکٹیں حاصل کیں جبکہ حارث رؤف اور عاکف جاوید نے 2،2، نسیم شاہ اور محمد علی نے ایک ایک کھلاڑی کو آؤٹ کیا۔
پاکستان کی اچھی اوپننگ لیکن پھر سب فیل
اوپنر عبداللّٰہ شفیق اور عثمان خان نے ٹیم کو اچھا آغاز فراہم کیا اور پارٹنر شپ قائم کر کے اسکور 83 تک پہنچایا جس کے بعد پاکستان کی پہلی وکٹ گر گئی، عثمان خان 39 رنز بنا کر آؤٹ ہوئے۔پاکستان کی دوسری وکٹ 88 رنز پر گری جب عبداللّٰہ شفیق 36 رنز بنا کر آؤٹ ہوگئے۔
بابر اعظم اور محمد رضوان نے اسکور 164 تک پہنچایا۔ کپتان محمد رضوان 30 رنز بنا کر آؤٹ ہوئے۔ابر اعظم نے ذمہ دارانہ بیٹنگ جاری رکھی اور انہوں نے 65 گیندوں پر 2 چھکوں اور 2 چوکوں کی مدد سے ففٹی بنائی جو کہ ان کے ون ڈے انٹرنیشنل کیریئر کی 36 ویں نصف سنچری تھی۔
نیوزی لینڈ کے خلاف پاکستان کی چوتھی وکٹ 38.4 اوورز میں 249 رنز پر گری، بابر اعظم 78 رنز بنا کر آؤٹ ہوئے۔
بابر اعظم کے ساتھ پارٹنر شپ قائم کرنے والے سلمان آغا نے ایک اینڈ سنبھالے رکھا تاہم دوسرے اینڈ سے 40 ویں اوور میں 253 رنز پر پاکستان کی لگاتار 2 وکٹیں گر گئیں، طیب طاہر 1 اور عرفان خان صفر پر آؤٹ ہوئے۔
اس دوران سلمان آغا نے 40 گیندوں پر 2 چھکوں اور 4 چوکوں کی مدد سے ففٹی بنائی۔
نیوزی لینڈ کے خلاف پاکستان کی ساتویں وکٹ 267 رنز پر گری، نسیم شاہ صفر پر آؤٹ ہوئے جبکہ آٹھویں وکٹ 269 رنز پر گری، حارث رؤف 1 رن بنا کر آؤٹ ہوئے۔
قومی ٹیم کی نویں وکٹ 43.4 اوورز میں 271 رنز پر گری، سلمان آغا 58 رنز بنا کر کیچ آؤٹ ہوئے۔
