بھارتی کرکٹ ٹیم کے مایہ ناز بلے باز ورات کوہلی اور روہت شرما نے ٹیسٹ اور ٹی 20 فارمیٹ کو الوداع کہہ دیا ہے لیکن اب دونوں کھلاڑیوں کے ون ڈے سے بھی ریٹائرمنٹ کی خبریں گردش کر رہی ہیں۔
ورات کوہلی اور روہت شرما کی ون ڈے فارمیٹ سے ریٹائرمنٹ کے معاملے پر پر بھارتی کرکٹ بورڈ (بی سی سی آئی) نے اپنی خاموشی توڑدی ہے۔
بی سی سی آئی کے نائب صدر راجیو شکلا نے کہا ہے کہ وراٹ کوہلی اور روہت شرما ابھی ریٹائرمنٹ لینے نہیں جا رہے ہیں۔ وہ ٹیم انڈیا کی طرف سے کھیلتے ہوئے نظر آئیں گے۔
ایک ’ٹاک شوک‘ میں راجیو شکلا نے وراٹ کوہلی اور روہت شرما کے یک روزہ کرکٹ کو خیرباد کہنے کی خبروں کو خارج کرتے ہوئے کہا کہ ہماری پالیسی بالکل واضح ہے۔ بورڈ کبھی کسی کھلاڑی کو ریٹائرمنٹ لینے کے لیے نہیں کہتا، اسے اپنا فیصلہ خود لینا ہوتا ہے۔
انہوں نے کہا کہ وراٹ کوہلی ابھی بھی سب سے فٹ کھلاڑیوں میں سے ایک ہیں اور روہت شرما ایک بہترین ونڈے کھلاڑی ہیں ۔ دونوں ابھی ون ڈے فارمیٹ میں کھیلتے رہیں گے۔ روہت اور ورات دونوں ابھی بھی ون ڈے ٹیم میں ہیں، تو اگر وہ ابھی کھیل رہے ہیں تو وداعی کی بات کیوں ہو رہی ہے؟ آپ لوگ ابھی سے فکر کیوں کر رہے ہیں؟
