پاکستان نے زمین سے زمین پر مار کرنے والے فتح 4 میزائل کا کامیاب تربیتی تجربہ کیا ہے۔
پاک فوج کے شعبہ تعلقات عامہ (آئی ایس پی آر) نے کہا ہے کہ فتح 4 میزائل کی رینج 750 کلومیٹر ہے اور اسے مقامی طور پر تیار کیا گیا ہے۔
جدید ایویونکس اور نیوی گیشنل ایڈز سے لیس یہ میزائل ناصرف انتہائی درستگی کے ساتھ اپنے ہدف کو نشانہ بناتا ہے اور دشمن کے میزائل ڈیفنس سسٹم سے بچنے کی صلاحیت بھی رکھتا ہے۔
فتح-4 کی شمولیت سے آرمی راکٹ فورس کمانڈ کی صلاحیت میں مزید اضافہ ہوگا اور پاکستان آرمی کے روایتی میزائل نظام کی رینج، تباہ کن طاقت اور بقا کی صلاحیت بہتر ہوگی۔
صدرِ مملکت آصف علی زرداری، وزیرِاعظم شہباز شریف، چیئرمین جوائنٹ چیفس آف اسٹاف کمیٹی اور سروسز چیفس نے کامیاب تجربے پر مبارکباد دی ہے۔
