بھارت کی پنجابی فلم انڈسٹری سے بالی ووڈ تک کامیاب سفر طے کرنے والی معروف اداکارہ سونم باجوہ ایک بار پھر اپنی سادگی اور مثبت سوچ کے باعث مداحوں کی توجہ کا مرکز بن گئی ہیں۔ سونم باجوہ نے سوشل میڈیا پر ایک بلیک اینڈ وائٹ پوسٹ شیئر کی، جس میں انہوں نے زندگی سے متعلق اپنے دل کی بات کہی۔
اداکارہ نے اپنے پیغام میں واضح کیا کہ وہ کبھی بھی اپنی زندگی کو مکمل یا پرفیکٹ دکھانے کی کوشش نہیں کرتیں، بلکہ یہ مانتی ہیں کہ جو کچھ بھی ہے، وہ سب اوپر والے کی مہربانی سے ہے۔
سونم باجوہ کے مطابق زندگی میں ہر مرحلہ اللہ کی عطا اور اس کے انتظام کے تحت آگے بڑھتا ہے۔
ان کے اس سادہ مگر گہرے پیغام کو مداحوں نے بے حد پسند کیا۔ سوشل میڈیا پر فینز ان کی عاجزی، مثبت سوچ اور شکرگزاری کے جذبے کی کھل کر تعریف کر رہے ہیں اور اس پوسٹ کو انسپائریشن قرار دے رہے ہیں۔
کام کے محاذ پر سونم باجوہ اس وقت اپنی حالیہ ریلیز فلم ‘بارڈر 2’ کی کامیابی سے بھی خبروں میں ہیں، جو 23 جنوری کو ریلیز ہوئی اور باکس آفس پر شاندار ردِعمل حاصل کر رہی ہے۔ فلم میں سونم باجوہ کے ساتھ سنی دیول، ورن دھون، دلجیت دوسانجھ، مونا سنگھ اور اہان شیٹی جیسے بڑے نام شامل ہیں، جبکہ فلم عالمی سطح پر 295 کروڑ روپے سے زائد کا بزنس کر چکی ہے۔
اس کے علاوہ سونم باجوہ ہاؤس فل 5، باغی 4 اور ایک دیوانے کی دیوانیت جیسی فلموں کے ذریعے بالی ووڈ میں اپنی مضبوط موجودگی درج کرا چکی ہیں۔ کم وقت میں بڑی کامیابیاں حاصل کرنے کے باوجود ان کی سادگی اور شکرگزاری ہی انہیں دوسروں سے منفرد بناتی ہے۔
