ارجنٹائن کے عالمی شہرت یافتہ فٹبالر لیونل میسی نے والد جارج میسی کے انتقال کے بعد فٹبال کھیلنا جاری رکھنے کے حوالے سے سنجیدہ شکوک کا اظہار کردیا۔
میسی نے سوشل میڈیا پر اپنے جذباتی پیغام میں کہا کہ انہیں نہیں معلوم کہ والد کے بغیر زندگی کیسے آگے بڑھے گی اور اب انہیں زیادہ عرصے تک فٹبال کھیلتے رہنے کے بارے میں ’’سنجیدہ شکوک‘‘ ہیں۔
میسی کے والد اور ان کے ایجنٹ جارج میسی گزشتہ ہفتے 68 برس کی عمر میں انتقال کرگئے تھے۔ میسی نے اپنے والد کی آخری زندگی اور 2026 ورلڈ کپ کے دوران ان کی غیر موجودگی کو یاد کرتے ہوئے کہا کہ والد کی خواہش تھی کہ وہ ایک آخری ورلڈ کپ کھیلیں، تاہم ٹورنامنٹ شروع ہونے سے چند روز قبل ان کی طبیعت بگڑ گئی۔
میسی کے مطابق وہ ہر میچ کے بعد اپنے والد کے پیغام کا انتظار کرتے تھے اور اسی دوران انہیں احساس ہوا کہ صورتحال واقعی خراب ہے۔ ارجنٹائن ورلڈ کپ کے فائنل تک پہنچا لیکن میسی کے والد یہ مقابلہ دیکھنے کے لیے موجود نہ تھے۔
اسپین کے خلاف فائنل میں ارجنٹائن کی 1-0 سے شکست کا حوالہ دیتے ہوئے میسی نے کہا کہ وہ اپنے والد کے لیے ورلڈ کپ جیتنا چاہتے تھے اور انہیں نئی ٹرافی دکھانا چاہتے تھے، لیکن وہ کامیاب نہ ہوسکے۔ ان کے بقول اس بار انہوں نے اپنی جسمانی حدود سے آگے جانے کی کوشش کی، مگر ایسا نہ کرسکے اور انہیں خود کو کبھی مکمل طور پر درست محسوس نہیں ہوا۔
میسی ورلڈ کپ فائنل کے بعد ارجنٹائن کے شہر روزاریو واپس گئے جہاں انہوں نے اپنے خاندان کے ساتھ وقت گزارا۔ ان کے والد کی آخری رسومات اتوار کو قریبی عزیزوں اور ارجنٹائن کے چند ساتھی کھلاڑیوں کی موجودگی میں ادا کی گئیں۔
اپنے والد کو خراجِ عقیدت پیش کرتے ہوئے میسی نے کہا کہ جارج ان کے والد، دوست اور ایجنٹ تھے اور زندگی کے ہر مرحلے پر وہی شخص رہے جس کی انہیں ضرورت تھی۔
جارج میسی نے 2000 میں اپنے 13 سالہ بیٹے کے ساتھ ارجنٹائن سے اسپین منتقل ہوکر اس وقت ان کا ساتھ دیا تھا جب بارسلونا نے نوجوان میسی کو کلب کی یوتھ ٹیم میں شامل ہونے اور گروتھ ہارمون کی کمی کا علاج جاری رکھنے کے لیے مدعو کیا تھا۔
بعد ازاں جارج میسی نے اپنے بیٹے کے ایجنٹ کی حیثیت سے بارسلونا، پیرس سینٹ جرمین اور انٹر میامی سمیت مختلف کلبوں کے ساتھ معاہدوں میں اہم کردار ادا کیا۔
لیونل میسی نے کہا کہ ان کے والد بچپن سے ہی انہیں ہر ٹریننگ پر لے کر جاتے تھے، کوئی میچ نہیں چھوڑتے تھے اور انہیں کھیلتے دیکھ کر پریشان بھی ہوتے اور لطف بھی اٹھاتے تھے۔
میسی نے اپنے پیغام کے اختتام پر والد کے لیے دعا کرتے ہوئے کہا کہ وہ اب بھی اسی طرح ان کی نگرانی کریں جیسے زندگی بھر کرتے رہے۔
