کیمرےکی مددسے تصویر لیتے وقت اکثر لوگ کروپڈ سینسر اور فل فریم کے درمیان انتخاب کے لئے الجھن میں پڑ جاتے ہیں۔ دونوں سینسرز کے اپنے فوائد ہیں، لیکن تصویر کے معیار، روشنی اور فوٹوگرافی کی ضرورت کے مطابق درست انتخاب ہی بہتر نتائج دے سکتا ہے۔
کراپڈ یا فل فریم سینسر میں انتخاب کرتے وقت صرف میگا پکسلز دیکھنا کافی نہیں۔ دونوں سینسر اپنی جگہ مختلف فوائد رکھتے ہیں، جبکہ بہتر انتخاب کا انحصار فوٹوگرافی کی ضرورت، بجٹ اور استعمال پر ہوتا ہے۔
فل فریم سینسر کیا ہے؟
فل فریم سینسر کا سائز تقریباً 36×24 ملی میٹر ہوتا ہے، جو عام طور پر کراپڈ سینسر سے بڑا ہے۔ بڑے سینسر کی وجہ سے کم روشنی میں بہتر کارکردگی، زیادہ ڈائنامک رینج اور پس منظر کو زیادہ دھندلا کرنے کی صلاحیت مل سکتی ہے۔
اسی لیے پورٹریٹ، نائٹ فوٹوگرافی، ویڈنگ اور پروفیشنل فوٹوگرافی میں فل فریم کیمرے خاص طور پر مقبول ہیں۔
کراپڈ سینسر کی خاص بات کیا ہے؟
کراپڈ سینسر، جیسے اے پی ایس- سی سائز میں چھوٹا ہوتا ہے لیکن اس کا مطلب یہ نہیں کہ اس سے اچھی تصاویر نہیں لی جاسکتیں۔ جدید کراپڈ کیمرے بہترین تفصیل، رنگ اور آٹو فوکس فراہم کرسکتے ہیں۔
اس کا ایک فائدہ یہ بھی ہے کہ کیمرہ اور لینز عموماً کم قیمت، ہلکے اور زیادہ کمپیکٹ ہوتے ہیں۔ اس لیے شوقیہ فوٹوگرافروں اور سفر کے لیے کراپڈ سینسر ایک اچھا انتخاب ہوسکتا ہے۔
زوم اور وائلڈ لائف میں کراپڈ کا فائدہ
کراپ فیکٹر کی وجہ سے ایک ہی فوکل لینتھ کا لینز کراپڈ سینسر پر نسبتاً زیادہ زوم جیسا فریم فراہم کرتا ہے۔ یہی وجہ ہے کہ وائلڈ لائف، برڈ فوٹوگرافی اور اسپورٹس میں اے پی ایس- سی سینسر کئی فوٹوگرافروں کے لیے مفید ثابت ہوتا ہے۔
کم روشنی میں کون آگے؟
عام طور پر ایک ہی نسل اور ملتی جلتی ٹیکنالوجی کے سینسرز کا موازنہ کیا جائے تو فل فریم سینسر کم روشنی میں بہتر نتائج اور کم شور فراہم کرسکتا ہے۔ تاہم کیمرے کی مجموعی ٹیکنالوجی، لینز اور فوٹوگرافر کی تکنیک بھی نتیجے پر بہت اثر ڈالتی ہے۔
آخرکار کون سا سینسر لیں؟
اگر آپ کو پروفیشنل پورٹریٹ، کم روشنی، زیادہ بیک گراؤنڈ بلر اور زیادہ ڈائنامک رینج چاہیے تو فل فریم بہتر انتخاب ہوسکتا ہے۔
اگر آپ سفر، وائلڈ لائف، اسپورٹس، روزمرہ فوٹوگرافی یا محدود بجٹ میں اچھا کیمرہ چاہتے ہیں تو کراپڈ سینسر بہترین ویلیو دے سکتا ہے۔
مختصر طور پر اگر کہا جائے تو پروفیشنل اور کم روشنی کی فوٹوگرافی کے لئے فل فریم جبکہ سفر اور روزمرہ استعمال کے کراپڈ بہتر ہے۔
اسی طرح وائلڈ لائف اور اسپورٹس کےلئے کراپڈ جبکہ پورٹریٹ اور زیادہ بیک گراؤنڈ بلر کے لئے فل فریم بہتر ہے۔
