دوحا:قطر کی گیس ٹرانسپورٹ کمپنی نے تصدیق کی ہے کہ اس کا مائع قدرتی گیس (ایل این جی) بردار جہاز خلیج عرب میں نامعلوم اشیا کی زد میں آ گیا۔ واقعہ جمعہ 30 اکتوبر کی شام پیش آیا، تاہم جہاز کے عملے کے تمام ارکان محفوظ رہے اور سمندر میں آلودگی کی بھی کوئی اطلاع نہیں ملی۔
قطری خبر رساں ادارے کے مطابق قطر گیس ٹرانسپورٹ کمپنی (نکلات) کا جہاز ال میدہ خلیج عرب سے گزر رہا تھا کہ اسے نامعلوم اشیا سے نشانہ بنایا گیا۔ کمپنی نے یکم نومبر کو واقعے کی تصدیق کرتے ہوئے بتایا کہ جہاز محفوظ حالت میں ہے اور بدستور آپریشنل ہے۔
کمپنی کے مطابق واقعے سے ہونے والے ممکنہ نقصان کا جائزہ لیا جا رہا ہے جبکہ علاقائی میری ٹائم سیکیورٹی حکام کے ساتھ رابطہ برقرار ہے۔ جہاز اور عملے کی حفاظت کے لیے صورتحال پر مسلسل نظر رکھی جا رہی ہے۔
آبنائے ہرمز اور خطے میں کشیدگی کا پس منظر
یہ واقعہ ایسے وقت میں پیش آیا ہے جب مشرقِ وسطیٰ میں ایران، امریکا اور اسرائیل کے درمیان جاری کشیدگی کے باعث خلیج اور آبنائے ہرمز میں تجارتی جہازوں کی آمدورفت کو سیکیورٹی خدشات کا سامنا ہے۔
آبنائے ہرمز عالمی توانائی کی ترسیل کا انتہائی اہم سمندری راستہ ہے، جہاں سے تیل اور مائع قدرتی گیس کی بڑی مقدار عالمی منڈیوں تک پہنچائی جاتی ہے۔ حالیہ دنوں میں اس علاقے میں دیگر تجارتی جہاز بھی نامعلوم حملوں کی زد میں آ چکے ہیں۔
تاہم قطری جہاز کو نشانہ بنانے والے عناصر اور استعمال ہونے والے طریقے کے بارے میں تاحال کوئی حتمی تفصیلات سامنے نہیں آئی ہیں۔
