ایشیا کپ میں پاک بھارت میچ میں دونوں ٹیموں کے آپس میں مصافحہ نہ کرنے کی وجہ سے تنقید کا نشانہ بننے والے میچ ریفری اینڈی پائیکرافٹ نے پاکستانی ٹیم سے معافی مانگ لی ہے۔
پاکستان کرکٹ بورڈ (پی سی بی) نے جاری بیان میں کہا کہ آئی سی سی کے متنازع میچ ریفری اینڈی پائیکرافٹ نے پاکستانی کرکٹ ٹیم کے مینیجر اور ٹیم کے کپتان سے معذرت کر لی ہے۔
اینڈی پائیکرافٹ نے انڈیا اور پاکستان کے میچ میں دونوں ٹیموں کے کپتانوں کو ایک دوسرے کے ساتھ مصافحہ کرنے سے منع کیا تھا۔ پاکستان کرکٹ بورڈ نے اینڈی پائیکرافٹ کے اس عمل پر سخت ردِعمل کا اظہار کیا تھا۔
پی سی بی کےبیان کے مطابق اینڈی پائیکرافٹ نے 14 ستمبر کے واقعے کو مس کمیونیکیشن (غلط فہمی) کا نتیجہ قرار دے کر معذرت کی، آئی سی سی نے 14 ستمبر کو میچ کے دوران کوڈ آف کنڈکٹ کی خلاف ورزی کی انکوائری پر آمادگی کا اظہار کیا ہے۔
