پاکستان سپر لیگ (پی ایس ایل) کی مقبول فرنچائز پشاور زلمی نے بھی آئندہ 10 سال کے لیے پی ایس ایل کے ساتھ اپنا فرنچائز معاہدہ تجدید کر لیا ہے۔ اس فیصلے کے بعد زلمی کی ملکیت موجودہ مالکان کے پاس برقرار رہے گی۔
پی ایس ایل کے سی ای او سلمان نصیر نے کہا کہ پشاور زلمی کا معاہدے کی تجدید کرنا لیگ پر اعتماد کا مظہر ہے اور ٹیم کی انرجی اور فین کنیکٹ پی ایس ایل کی شناخت ہے۔ انہوں نے مزید کہا کہ فرنچائز کی کارکردگی اور شائقین کی وابستگی نے لیگ کی مضبوطی میں اہم کردار ادا کیا ہے۔
چیئرمین پی ایس ایل محسن نقوی نے کہا کہ جاوید آفریدی کی قیادت میں پشاور زلمی پاکستان کی سب سے مقبول فرنچائز بن گئی ہے اور جاوید کا ویژن زلمی اور پی ایس ایل دونوں کے لیے مضبوط اساس ہے۔
پشاور زلمی کی فین انگیجمنٹ اور کارکردگی نے ٹیم کے لیے مضبوط کمرشل وراثت قائم کی ہے، اور اس نئے 10 سالہ معاہدے کی خبر نے شائقین میں خوشی کی لہر دوڑا دی ہے۔
پی ایس ایل کے اگلے 11ویں ایڈیشن میں آئندہ سال 8 ٹیمیں حصہ لیں گی اور پشاور زلمی کی شمولیت لیگ کی رونق میں مزید اضافہ کرے گی۔
