اسلام آباد کی انسدادِ دہشت گردی عدالت نے 9 مئی کے واقعات کے تناظر میں ریاستی اداروں کے خلاف ڈیجیٹل سرگرمیوں سے متعلق مقدمات کا فیصلہ سنا دیا ہے۔
عدالت نے عادل راجہ، حیدر مہدی، وجاہت سعید، صابر شاکر اور معید پیرزادہ کو دو، دو مرتبہ عمر قید کی سزا سنائی۔ اس کے علاوہ مختلف دفعات کے تحت مجموعی طور پر 35 سال قید اور 15 لاکھ روپے جرمانہ بھی عائد کیا گیا۔
یہ فیصلہ جج طاہر عباس سپرا نے اس وقت سنایا جب ٹرائل مکمل ہونے کے بعد فیصلہ محفوظ کر لیا گیا تھا۔ دورانِ سماعت پراسیکیوشن نے عدالت میں 24 گواہ پیش کیے۔
تھانہ آبپارہ کے مقدمے میں صابر شاکر، معید پیرزادہ اور سید اکبر حسین کو عمر قید کی سزا دی گئی، جبکہ تھانہ رمنا کے کیس میں شاہین صہبائی، حیدر مہدی اور وجاہت سعید کو سزا سنائی گئی۔
عدالت نے پراسیکیوشن کی درخواست پر ملزمان کی غیر موجودگی میں ہی کارروائی مکمل کی۔ پراسیکیوشن کی جانب سے راجا نوید حسین کیانی عدالت میں پیش ہوئے، جبکہ ملزمان کی نمائندگی کے لیے گلفام اشرف گورائیہ ایڈووکیٹ پیش ہوئے، جنہیں عدالت نے سرکاری طور پر وکیل مقرر کیا تھا۔
عدالت نے واضح کیا کہ انسدادِ دہشت گردی قوانین کے تحت ملزمان کی عدم حاضری میں بھی ٹرائل قانونی طور پر مکمل کیا جا سکتا ہے۔
