ٹی 20 ورلڈ کپ سے قبل انٹرنیشنل کرکٹ کونسل (آئی سی سی) اور عالمی کھلاڑیوں کی تنظیم ورلڈ کرکٹرز ایسوسی ایشن (ڈبلیو سی اے) کے درمیان شدید تنازع پیدا ہو گیا ہے۔ مسئلہ بنیادی طور پر کھلاڑیوں کے نام، تصویر اور تشخص (این آئی ایل) کے حقوق، ڈیٹا کے استعمال، اور کمرشل مواد پر کنٹرول سے متعلق ہے۔
ڈبلیو سی اے کا دعویٰ ہے کہ آئی سی سی نے کھلاڑیوں کو جو نیا شرائط نامہ بھیجا ہے، وہ 2024 میں دستخط شدہ معاہدے کے مطابق نہیں ہے اور موجودہ ورژن کھلاڑیوں کے حقوق کو نقصان پہنچانے والا ہے۔
آئی سی سی نے جواب میں کہا کہ 2024 کا معاہدہ صرف آٹھ ممبر بورڈز (آسٹریلیا، انگلینڈ، نیوزی لینڈ، ساؤتھ افریقہ، ویسٹ انڈیز، آئرلینڈ، نیدرلینڈز، اسکاٹ لینڈ) پر لاگو تھا، جبکہ باقی ممالک کے کھلاڑی اس پر پابند نہیں ہیں۔
ڈبلیو سی اے کے مطابق 2024 کے معاہدے میں کھلاڑیوں کو خود اپنی این آئی ایل حقوق اور ڈیٹا استعمال پر فیصلہ کرنے کا حق دیا گیا تھا، جبکہ آئی سی سی کے نئے ورژن میں یہ اختیار کھلاڑیوں کے قومی بورڈز کے پاس ہے۔ نئے ورژن کے مطابق کھلاڑیوں کے این آئی ایل کو کسی بھی تیسرے فریق کو لائسنس دینے، اور تین کھلاڑیوں کو کسی آئی سی سی پارٹنر کی تشہیر میں استعمال کرنے کا اختیار آئی سی سی اور قومی بورڈز کو حاصل ہے۔
مزید برآں، آئی سی سی کے نئے ورژن میں کہا گیا ہے کہ شرکت کرنے کے بعد کھلاڑی خود بخود شرائط کو قبول کر چکے ہیں، جبکہ 2024 کے معاہدے کے مطابق ہر ایونٹ کے لیے الگ دستخط اور رضامندی ضروری تھی۔
ڈبلیو سی اے کے چیف آپریٹنگ آفیسر ٹام موفٹ نے کھلاڑیوں کو بھیجے گئے میمو میں کہا کہ آئی سی سی اور ممبر بورڈز نے تمام تحفظات ختم کرنے کی کوشش کی ہے اور کھلاڑیوں کی کمزور، کم تنخواہ والی کلاس کو کمزور بنانے اور انہیں غیر مساوی شرائط پر کھیلنے پر مجبور کیا جا رہا ہے۔
ٹام موفٹ نے مزید کہا کہ ڈبلیو سی اے عالمی کرکٹ اور آئی سی سی ایونٹس کی ترقی کی حمایت کرتا ہے، لیکن یہ ترقی کھلاڑیوں کے نقصان پر نہیں ہونی چاہیے۔ متاثرہ کھلاڑیوں کے لیے دستخط شدہ 2024 شرائط کو آئی سی سی کو T20 ورلڈ کپ کے دوران بھی تسلیم کرنا چاہیے
اس وقت تک آئی سی سی نے ڈبلیو سی اے کے تازہ ترین خط پر کوئی جواب نہیں دیا۔ معاملہ اب ورلڈ کپ سے پہلے کھلاڑیوں کے حقوق اور کمرشل تحفظات پر بین الاقوامی بحث کا محور بن چکا ہے۔
