اسلامی نظریاتی کونسل نے بینک اکاؤنٹس سے رقم نکالنے پر ود ہولڈنگ ٹیکس کو غیر شرعی قرار دے دیا۔
میدیا رپورٹس کے مطابق اسلامی نظریاتی کونسل کا اجلاس چیئرمین راغب نعیمی کی زیر صدارت اسلام آباد میں منعقد ہوا۔ جس میں مختلف امور پر بات کی گئی۔
اجلاس کے بعد جاری کئے گئے اعلامیے کے مطابق اسلامی نظریاتی کونسل نے کہا کہ بینک سے رقم نکالنے پر حکومت کا عائد کردہ ود ہولڈنگ ٹیکس غیر شرعی اور زیادتی کے مترادف ہے۔
اسلامی نظریاتی کونسل کے اعلامیئے کے مطابق اجلاس میں انسانی دودھ ذخیرہ کرنے کے معاملے پر غورکیا۔ کونسل اس نتیجے پر پہنچی ہےکہ دودھ ذخیرہ کرنے کے مخصوص ادارے مخصوص شرائط کے تحت قائم کئے جا سکتے ہیں۔ لیکن اس سے پہلے لازمی قانون سازی کی جائے۔
کونسل نے دیت کے قانون میں ترمیم کی شقوں کی مخالفت کرتے ہوئےکہا ہےکہ دیت کی سونا چاندی اور اونٹ سے متعلق شرعی مقداریں قانون میں شامل رہنی چاہیئں۔ شوگر کے مریضوں کے لیے حلال اجزا والی انسولین دستیاب ہے، حلال اجزا والی انسولین کی دستیابی پر خنزیر کے اجزاء پر مشتمل انسولین سے پرہیز کیا جائے۔
