اداکار گووندا کو منگل کی رات بے ہوشی کے بعد ممبئی کے اسپتال میں داخل کرایا گیا۔ ڈاکٹروں کے مطابق ان کی حالت اب مستحکم ہے اور وہ نگرانی میں ہیں۔
بالی وڈ کے معروف اداکار اور سابق رکن پارلیمنٹ گووندا کی طبیعت اچانک بگڑنے کے بعد انہیں ممبئی کے جوہو علاقے میں واقع کرٹیکئیر اسپتال میں داخل کرایا گیا۔ اطلاعات کے مطابق منگل کی شب 8 بجے کے قریب گووندا کو اچانک چکر اور بے ہوشی جیسی کیفیت محسوس ہوئی، جس کے بعد گھر والوں نے فوراً انہیں اسپتال پہنچایا۔ اسپتال ذرائع کے مطابق داخلے کے وقت اداکار کو ’ڈس اورینٹیشن‘ یعنی بے ہوشی اور ذہنی الجھن کی حالت میں لایا گیا تھا۔
گووندا کے قریبی دوست اور قانونی مشیر لَلِت بندل نے میڈیا سے گفتگو میں اس خبر کی تصدیق کی۔ ان کے مطابق فی الحال اداکار کی حالت مستحکم ہے اور وہ ڈاکٹروں کی نگرانی میں آرام کر رہے ہیں۔ بندل نے بتایا کہ کئی ابتدائی جانچیں کی جا چکی ہیں اور ان کی رپورٹ کا انتظار ہے، جس کے بعد علاج کے اگلے مرحلے پر فیصلہ کیا جائے گا۔
یہ پہلا موقع نہیں جب اداکار کو صحت سے متعلق دشواری پیش آئی ہو۔ تقریباً ایک سال قبل گووندا اپنے ہی گھر میں ایک حادثے کا شکار ہوئے تھے، جب وہ اپنی لائسنس یافتہ پستول صاف کر رہے تھے۔ اس دوران غلطی سے گولی چل گئی جو ان کے بائیں گھٹنے میں لگی۔ اس واقعے میں وہ زخمی ہوئے تھے اور ان کی فوری سرجری کی گئی تھی۔ بعد ازاں وہ مکمل طور پر صحتیاب ہو گئے تھے۔
گووندا کی بیٹی ٹینا آہوجا نے اس واقعے کے وقت بتایا تھا کہ انہوں نے اپنے والد کو خود اسپتال پہنچایا تھا اور آپریشن کے دوران ان کے گھٹنے سے گولی نکالی گئی تھی۔ اس حادثے کے بعد سوشل میڈیا پر ان کے مداحوں نے ان کی جلد صحت یابی کے لیے بڑی تعداد میں دعائیں کی تھیں۔
