چیف آف ڈیفنس فورسز فیلڈ مارشل عاصم منیر نے کہا ہے کہ پاک فوج قومی استحکام کو نقصان پہنچانے والے تفرقہ انگیز عناصر سے نمٹنے کے لیے مکمل طور پر مستعد ہے۔
آئی ایس پی آر کے مطابق چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیرنے گوجرانوالہ اور سیالکوٹ گیریژن کا دورہ کیا۔ جہاں انہیں فارمیشن کی آپریشنل تیاریوں اور جنگی صلاحیتوں میں اضافے کے لیے کیے گئے اہم اقدامات پر تفصیلی بریفنگ دی گئی۔
دورے کے دوران فیلڈ مارشل نے فیلڈ ٹریننگ مشق اور جدید سمیولیٹر ٹریننگ سہولت کا مشاہدہ کیا اور فارمیشن کے اعلیٰ پیشہ ورانہ معیار اور مجموعی تیاریوں کو سراہا۔
اس موقع پر انہوں نے ٹیکنالوجی سے ہم آہنگی کی اہمیت پر زور دیتے ہوئے کہا کہ جدید جنگی ماحول میں تیزی، درستگی، صورتحال کا فوری ادراک اور تیز رفتار فیصلہ سازی ناگزیر ہو چکی ہے۔
افسران اور جوانوں سے خطاب کرتے ہوئے چیف آف آرمی اسٹاف اور چیف آف ڈیفنس فورسز نے ان کے بلند حوصلے اور قومی سلامتی کے لیے غیر متزلزل عزم کو سراہا اور مشن پر مبنی، سخت تربیت کی ضرورت پر زور دیا۔
انہوں نے کہا کہ پاکستان آرمی اندرونی و بیرونی چیلنجز سے نمٹنے کے لیے پوری طرح مستعد ہے، جن میں دشمن کی ہائبرڈ جنگ، انتہاپسند نظریات اور قومی استحکام کو نقصان پہنچانے والی تقسیم پیدا کرنے والی سرگرمیاں شامل ہیں۔
