وفاقی حکومت نے ریاست مخالف، گمراہ کن اور اشتعال انگیز پروپیگنڈا کرنے والے شرپسند عناصر کے خلاف سخت کارروائی کا آغاز کر دیا ہے۔ اسی سلسلے میں بھگوڑے عادل فاروق راجہ کے گرد گھیرا مزید تنگ کر دیا گیا ہے۔
وفاقی حکومت نے عادل فاروق راجہ کو ریاست مخالف سرگرمیوں میں ملوث پائے جانے پر انسداد دہشت گردی ایکٹ 1997 کے تحت پابندی عائد کر دی ہے۔ اس حوالے سے وفاقی وزارت داخلہ نے باقاعدہ نوٹیفکیشن جاری کرتے ہوئے عادل فاروق راجہ کا نام فورتھ شیڈول اور کالعدم اشخاص کی فہرست میں شامل کر لیا ہے۔
وزارت داخلہ کے نوٹیفکیشن کے مطابق عادل فاروق راجہ پر پابندی انسداد دہشت گردی ایکٹ کی شق 11EE کے تحت لگائی گئی ہے۔ وزارت کا کہنا ہے کہ عادل فاروق راجہ سوشل میڈیا کے ذریعے کالعدم دہشت گرد تنظیموں سے وابستہ ریاست مخالف بیانیے اور گمراہ کن پروپیگنڈے کی معاونت اور ترویج میں ملوث رہا ہے۔
وزارت داخلہ کے مطابق عادل فاروق راجہ مسلسل ایسی سرگرمیوں میں مصروف ہے جو پاکستان کی قومی سلامتی، سالمیت اور عوامی نظم و نسق کے لیے شدید خطرات کا باعث بن رہی ہیں۔ نوٹیفکیشن میں مزید کہا گیا ہے کہ اس کا طرزِ عمل پاکستان کی خودمختاری اور قومی مفادات کے منافی اور تعصب پر مبنی ہے۔
وفاقی حکومت نے واضح کیا ہے کہ ریاست کے خلاف ہرزہ سرائی، اداروں کو نشانہ بنانے اور گمراہ کن پروپیگنڈا کرنے والوں کے خلاف زیرو ٹالرنس پالیسی کے تحت کارروائیاں جاری رہیں گی۔
