ڈسٹرکٹ اینڈ سیشن کورٹس اسلام آباد میں بانی پی ٹی آئی عمران خان کے خلاف 9 مئی اور دیگر پانچ مقدمات کی سماعت ہوئی۔ عدالت نے بانی پی ٹی آئی اور بشریٰ بی بی کی گرفتاری سے 6 فروری تک روک دیا اور ان کی ضمانتِ قبل از گرفتاری میں توسیع کر دی۔
سماعت ایڈیشنل ڈسٹرکٹ اینڈ سیشن جج محمد افضل مجوکہ نے کی۔ تاہم عمران خان کو عدالت میں یا ویڈیو لنک کے ذریعے پیش نہیں کیا جا سکا، جس کے باعث ضمانت کی درخواستوں پر دلائل نہ ہو سکے۔
عدالت نے آئندہ سماعت پر بانی پی ٹی آئی کو لازمی طور پر عدالت میں یا ویڈیو لنک کے ذریعے پیش کرنے کی ہدایت کرتے ہوئے کیس کی سماعت 6 فروری تک ملتوی کر دی۔
سماعت کے دوران عمران خان اور بشریٰ بی بی کی جانب سے خالد یوسف چوہدری اور شمسہ کیانی ایڈووکیٹ پیش ہوئیں۔
واضح رہے کہ بانی پی ٹی آئی کے خلاف 9 مئی کے واقعات، اقدامِ قتل اور جعلی رسیدوں سمیت متعدد مقدمات درج ہیں، جبکہ بشریٰ بی بی کے خلاف مبینہ طور پر جعلی رسیدیں جمع کروانے کا مقدمہ قائم ہے۔
