اسرائیل کے وسطی علاقے میں ہونے والے فائرنگ حملوں میں ایک شخص ہلاک اور چار دیگر زخمی ہو گئے، جبکہ اسرائیلی پولیس کے مطابق واقعے میں ملوث دو مشتبہ حملہ آوروں کو ہلاک کر دیا گیا ہے۔ حملے کے بعد سکیورٹی فورسز نے وسیع پیمانے پر سرچ آپریشن شروع کر دیا، جبکہ اطلاعات کے مطابق ایک اور مشتبہ شخص کی تلاش بھی جاری ہے۔
اسرائیلی پولیس کے مطابق فائرنگ کا ایک واقعہ کوخاو یائر کے قریب ایک پیٹرول اسٹیشن پر پیش آیا، جہاں شہریوں کو نشانہ بنایا گیا۔ اسرائیلی ایمرجنسی سروس میگن ڈیوڈ ایڈوم (MDA) کے مطابق تقریباً 30 سالہ ایک شخص موقع پر ہی جان کی بازی ہار گیا جبکہ چار افراد زخمی ہوئے، جن میں ایک کی حالت تشویشناک بتائی گئی ہے۔
حملے کے بعد اسرائیلی ہوم فرنٹ کمانڈ نے قلقیلیہ کے قریب واقع تزور یتزحاک بستی کے رہائشیوں کو گھروں میں رہنے کی ہدایت جاری کی۔ اسرائیلی فوج اور پولیس نے مختلف علاقوں میں اضافی نفری تعینات کر کے سرچ آپریشن تیز کر دیا ہے۔
دوسری جانب فلسطینی تنظیم حماس نے حملے پر ردعمل دیتے ہوئے اسے غزہ میں جاری اسرائیلی کارروائیوں، مغربی کنارے اور مشرقی یروشلم میں مبینہ آبادکاری، چھاپوں اور فلسطینیوں کے خلاف کارروائیوں کا ردعمل قرار دیا ہے۔ حماس نے اپنے بیان میں کہا کہ “مزاحمت کو دبانے کی کوششیں کامیاب نہیں ہوں گی” اور فلسطینی عوام اپنے حقوق کے حصول کی جدوجہد جاری رکھیں گے۔
اسی طرح فلسطینی تنظیم اسلامی جہاد نے بھی حملے کو اسرائیلی پالیسیوں کا نتیجہ قرار دیتے ہوئے کہا کہ یہ کارروائیاں فلسطینی عوام کے خلاف اقدامات کا فطری ردعمل ہیں۔
دوسری جانب اسرائیلی حکام نے حملے کی شدید مذمت کرتے ہوئے سکیورٹی اقدامات مزید سخت کر دیے ہیں۔ واقعے کے بعد خطے میں کشیدگی میں اضافے کے خدشات ظاہر کیے جا رہے ہیں، جبکہ تحقیقات اور سرچ آپریشن بدستور جاری ہیں۔
