عامر خان اور سنی دیول کی فلم بٹوارا 1947 ریلیز کے چند روز بعد ہی مبینہ تنازع کے باعث خبروں میں آگئی ہے۔ رپورٹس میں دعویٰ کیا جا رہا ہے کہ فلم کے منافع میں حصے اور او ٹی ٹی رائٹس کی ڈیل کو لے کر دونوں کے درمیان اختلافات پیدا ہوئے ہیں۔ تاہم، اس دعوے کی آزادانہ طور پر تصدیق نہیں ہوئی اور دونوں اداکاروں کی جانب سے بھی تاحال کوئی ردعمل سامنے نہیں آیا۔
فلم فیئر کی ایک رپورٹ کے مطابق، ایک بڑے او ٹی ٹی پلیٹ فارم نے بٹوارا 1947 کے ڈیجیٹل رائٹس کے لیے 60 کروڑ روپے کی پیشکش کی تھی۔ بتایا گیا ہے کہ عامر خان اور سنی دیول کے درمیان معاہدے کے تحت سنی دیول کو فلم کے منافع کا 50 فیصد حصہ ملنا تھا، اس لیے سنی مبینہ طور پر اس ڈیل کے حق میں تھے۔
رپورٹ کے مطابق عامر خان اس وقت ایک مختلف ڈیجیٹل ماڈل پر غور کر رہے تھے۔ وہ اپنی فلم ستارے زمین پر کو بھی روایتی او ٹی ٹی پلیٹ فارم کے بجائے یوٹیوب پر پے پر ویو یا ویڈیو آن ڈیمانڈ ماڈل کے ذریعے ریلیز کرنے کا تجربہ کر رہے تھے۔ اسی سوچ کے تحت مبینہ طور پر بٹوارا 1947 کی 60 کروڑ روپے کی او ٹی ٹی پیشکش بھی مسترد کردی گئی۔
رپورٹ میں ذرائع کے حوالے سے دعویٰ کیا گیا ہے کہ عامر خان کا یہ فیصلہ سنی دیول کو پسند نہیں آیا۔ فلم کی باکس آفس پر سست کارکردگی کے بعد اس کے او ٹی ٹی رائٹس کی مبینہ قیمت بھی تقریباً نصف رہ گئی ہے، جس کے نتیجے میں سنی دیول کے ممکنہ منافع میں بھی بڑی کمی واقع ہوئی۔ یعنی جس ڈیل سے سنی دیول کو 50 فیصد منافع ملنے کی توقع تھی، اس کی رقم کم ہونے سے ان کا حصہ بھی متاثر ہوگیا۔ تاہم یہ تمام دعوے میڈیا رپورٹس اور ذرائع پر مبنی ہیں اور ان کی باضابطہ تصدیق نہیں ہوئی۔
اب فلم کی باکس آفس کارکردگی کے ساتھ ساتھ اس کی او ٹی ٹی ڈیل بھی توجہ کا مرکز بن گئی ہے۔ دیکھنا یہ ہے کہ آنے والے دنوں میں عامر خان یا سنی دیول اس مبینہ تنازع پر کوئی وضاحت دیتے ہیں یا نہیں۔
