پاکستان ٹیسٹ کپتان بابر اعظم نے فارم کی بحالی اور طویل فارمیٹ کی تیاری کے لیے سات سال بعد ڈومیسٹک فرسٹ کلاس کرکٹ میں واپسی کا فیصلہ کرلیا۔
بابر اعظم جاری پریزیڈنٹ ٹرافی گریڈ ون میں آئل اینڈ گیس ڈویلپمنٹ کمپنی لمیٹڈ (او جی ڈی سی ایل) کی جانب سے بطور گیسٹ پلیئر ایکشن میں ہوں گے۔ بابر نے خود پی سی بی سے درخواست کی تھی کہ انہیں کسی ٹیم کے اسکواڈ میں شامل کیا جائے تاکہ وہ فرسٹ کلاس کرکٹ سے جڑے رہیں۔
بابر نے آخری مرتبہ 2019 میں قائداعظم ٹرافی میں فرسٹ کلاس میچ کھیلا تھا۔ اس کے بعد وہ مسلسل ڈومیسٹک فرسٹ کلاس کرکٹ سے دور رہے۔
ٹیسٹ کرکٹ میں بھی بابر کی فارم گزشتہ کچھ عرصے سے سوالات کی زد میں ہے۔ انہوں نے آخری ٹیسٹ سنچری دسمبر 2022 میں نیوزی لینڈ کے خلاف کراچی میں 161 رنز بنا کر اسکور کی تھی۔
2023 کے آغاز سے اب تک بابر کی ٹیسٹ اوسط 30.43 رہی ہے، جو ان کی مجموعی ٹیسٹ اوسط سے تقریباً 12 رنز کم ہے۔ اس عرصے میں وہ 39 اننگز میں صرف آٹھ نصف سنچریاں بناسکے ہیں۔
حالیہ دورۂ انگلینڈ میں پاکستان کو تینوں ٹیسٹ میچز میں شکست ہوئی، جہاں بابر کو شارٹ بال کے خلاف مشکلات کا سامنا کرنا پڑا۔ اس کے بعد ان کی تکنیک اور فارم پر ایک بار پھر بحث تیز ہوگئی۔
بابر کے علاوہ شاہین شاہ آفریدی اور سلمان علی آغا سمیت کئی قومی کھلاڑی بھی رواں سیزن میں پریزیڈنٹ ٹرافی میں حصہ لے رہے ہیں۔
پی سی بی کے سینٹرل کنٹریکٹ میں بھی ٹیسٹ اور ون ڈے کھلاڑیوں کے لیے سالانہ فرسٹ کلاس میچز کھیلنے کی شرط رکھی گئی ہے۔
دوسری جانب فاسٹ بولنگ آل راؤنڈر عامر جمال بھی فرسٹ کلاس کرکٹ میں واپس آگئے ہیں۔ وہ پریزیڈنٹ ٹرافی میں مارخور آئی ٹی سلوشنز کی نمائندگی کریں گے۔
