ممبئی: بالی وڈ کے معروف معاون اداکار مشتاق خان 56 برس کی عمر میں انتقال کرگئے۔ ان کے انتقال کی خبر سامنے آنے کے بعد بھارتی فلمی اور مزاحیہ دنیا میں افسوس کی لہر دوڑ گئی ہے۔
بھارتی میڈیا رپورٹس کے مطابق مشتاق خان نے جمعرات 24 ستمبر کو آخری سانس لی۔ وہ ممبئی کے ناناوتی اسپتال میں زیرِ علاج تھے۔ ان کے کاروباری ساتھی شیوَم نے ان کے انتقال کی تصدیق کرتے ہوئے بتایا کہ اداکار پھیپھڑوں کے کینسر میں مبتلا تھے، جس کے دوبارہ شدت اختیار کرنے پر انہیں اسپتال منتقل کیا گیا تھا۔
مشتاق خان کئی دہائیوں تک ہندی فلموں میں مختلف کرداروں کے ذریعے اپنی پہچان بناتے رہے۔ وہ فلم ویلکم میں اپنے مزاحیہ کردار کے باعث خاص طور پر مشہور ہوئے، جبکہ ہیرا پھیری، عاشقی، ہم ہیں راہی پیار کے، مجھ سے شادی کروگی اور گدر 2 جیسی فلموں میں بھی اداکاری کے جوہر دکھائے۔
فلم غدر: ایک پریم کتھا میں گل خان کے کردار نے بھی انہیں ناظرین میں نمایاں شناخت دلائی۔ فلموں کے علاوہ انہوں نے ٹیلی ویژن ڈراموں میں بھی کام کیا اور اپنی طویل فنی زندگی میں متعدد یادگار کردار نبھائے۔
مشتاق خان کے انتقال کی خبر نے ان کے مداحوں کو افسردہ کردیا ہے۔ ان کی اداکاری اور مزاحیہ کرداروں کو ہندی سنیما میں ان کی پہچان کے طور پر یاد رکھا جائے گا۔
