نیویارک: واٹس ایپ اپنے آئی فون صارفین کے لیے ایک ایسی سہولت تیار کر رہا ہے جس کے ذریعے چیٹ میں موصول ہونے والے ویب لنکس کھولنے کے لیے بار بار دوسری ایپ پر جانے کی ضرورت نہیں رہے گی۔ نئی تبدیلی کے تحت صارفین کسی خبر، ویب سائٹ یا دوسرے آن لائن صفحے کا لنک کھولیں گے تو وہ براہِ راست واٹس ایپ کے اندر ہی نظر آئے گا۔
ٹیکنالوجی سے متعلق اپ ڈیٹس پر نظر رکھنے والی ویب سائٹ ویبیٹا انفو کے مطابق، یہ فیچر واٹس ایپ کے آئی او ایس بیٹا ورژن 26.41.10.72 میں سامنے آیا ہے۔ تاہم، یہ ابھی تیاری کے مرحلے میں ہے اور فی الحال بیٹا صارفین کے لیے بھی دستیاب نہیں۔ کمپنی نے اسے عام صارفین تک پہنچانے کی تاریخ کا اعلان بھی نہیں کیا۔
سیٹنگز میں ملے گا نیا آپشن
مجوزہ فیچر میں صارفین کو واٹس ایپ کی سیٹنگز کے اندر ’’اِن ایپ براؤزر‘‘ کا آپشن ملے گا۔ اسے فعال کرنے کے بعد چیٹس میں شیئر کیے گئے لنکس ایپ کے اندر کھل سکیں گے۔ پہلی مرتبہ یہ سہولت آن کرنے پر ایک وضاحتی پیغام بھی دکھایا جائے گا تاکہ صارف کو معلوم ہو کہ ویب صفحات اب ڈیفالٹ براؤزر کے بجائے واٹس ایپ میں کھلیں گے۔
اگر کوئی صارف ویب سائٹ کو سفاری یا اپنے دوسرے پسندیدہ براؤزر میں دیکھنا چاہے تو اس کے لیے بھی راستہ موجود ہوگا۔ لنک کھولنے کے بعد مینو میں دیے گئے آپشن کے ذریعے صفحے کو ڈیفالٹ براؤزر میں منتقل کیا جاسکے گا۔
اس فیچر میں صرف ویب صفحات کھولنے کا طریقہ ہی نہیں بدلے گا بلکہ صارفین کو براؤزنگ سے متعلق ڈیٹا سنبھالنے کے اختیارات بھی ملیں گے۔ مجوزہ سیٹنگز کے ذریعے ویب سائٹس کی کوکیز اور کیش صاف کیے جاسکیں گے، جس سے صارف اپنے فون میں محفوظ ہونے والے براؤزنگ ڈیٹا کو منظم کرسکے گا۔ ویبیٹا انفو کے مطابق، یہ ڈیٹا فون ہی میں محفوظ ہوگا۔
اس وقت واٹس ایپ کی جانب سے اس سہولت کی حتمی ریلیز کے بارے میں کوئی تاریخ سامنے نہیں آئی۔ فیچر کی تیاری مکمل ہونے اور آزمائشی مراحل سے گزرنے کے بعد ہی معلوم ہوگا کہ اسے کن صارفین کے لیے جاری کیا جاتا ہے۔
اگر یہ سہولت عام صارفین تک پہنچتی ہے تو واٹس ایپ پر خبریں پڑھنے، دوستوں کے بھیجے گئے لنکس دیکھنے اور مختلف ویب صفحات تک رسائی کا عمل نسبتاً آسان ہوسکتا ہے۔ خاص طور پر ان صارفین کو فائدہ ہوگا جو روزانہ چیٹس میں موصول ہونے والے متعدد لنکس کھولتے ہیں اور ہر مرتبہ واٹس ایپ سے باہر نہیں جانا چاہتے۔
