انطالیہ: برطانیہ نے موسمیاتی تبدیلی کو قومی سلامتی کا مسئلہ قرار دیتے ہوئے دنیا میں پہلی مرتبہ خصوصی کلائمیٹ سکیورٹی نمائندہ مقرر کردیا۔ برطانوی وزیراعظم اینڈی برنہم نے اقوام متحدہ کے موسمیاتی سربراہی اجلاس کوپ 31 میں اس اہم تقرری کا اعلان کیا۔
فرانسیسی خبر رساں ادارے اے ایف پی کے مطابق برطانوی وزیراعظم نے ترکیہ کے شہر انطالیہ میں خطاب کرتے ہوئے کہا کہ موسمیاتی تبدیلی اب محض ماحولیات کا معاملہ نہیں بلکہ قومی سلامتی کے لیے بھی ایک بڑا خطرہ ہے۔
اینڈی برنہم کا کہنا تھا کہ وزیراعظم بننے کے ابتدائی تین ہفتے انہیں برطانیہ کی تاریخ کی بدترین جنگلاتی آگ سے نمٹنے میں گزارنے پڑے، جس کے بعد انہیں احساس ہوا کہ موسمیاتی خطرات سے نمٹنے کے لیے عالمی سطح پر قیادت اور تیاری ناگزیر ہے۔
برطانوی حکومت نے ڈیم میڈلین الیسینڈری کو ملک کی پہلی خصوصی نمائندہ برائے موسمیاتی سلامتی مقرر کیا ہے۔ وہ اس سے قبل برطانیہ کی جوائنٹ انٹیلی جنس کمیٹی کی سربراہ رہ چکی ہیں، جو حکومت کو قومی سلامتی کے خطرات سے متعلق مشاورت فراہم کرتی ہے۔
میڈلین الیسینڈری کے مطابق وہ حکومتی اداروں اور عالمی شراکت داروں کے ساتھ مل کر موسمیاتی خطرات کو بہتر طور پر سمجھنے، ان سے نمٹنے کی صلاحیت بڑھانے اور مستقبل کے چیلنجز کے لیے تیاری کو مضبوط بنانے پر کام کریں گی۔
رپورٹ کے مطابق برطانیہ سمیت مغربی یورپ نے رواں برس تاریخ کا گرم ترین موسم گرما دیکھا، جہاں شدید گرمی کی لہروں اور جنگلاتی آتش زدگی کے باعث ہزاروں افراد کی اضافی اموات ہوئیں۔
ماحولیاتی ماہرین نے اس تقرری کو اہم پیش رفت قرار دیتے ہوئے دوسرے ممالک کو بھی اسی طرز پر اقدامات کرنے کا مشورہ دیا ہے۔ گرین پیس نے بھی فیصلے کا خیرمقدم کیا، تاہم شمالی سمندر میں گیس فیلڈ کی ڈرلنگ کی اجازت دینے پر برطانوی حکومت کو تنقید کا نشانہ بنایا۔
ماہرین کے مطابق موسمیاتی تبدیلی اب صرف درجہ حرارت میں اضافے تک محدود نہیں رہی بلکہ خوراک، پانی، توانائی، نقل مکانی اور قومی سلامتی کے لیے بھی سنگین چیلنج بنتی جارہی ہے۔
