واشنگٹن : امریکی تھنک ٹینک پیو ریسرچ سینٹر کی نئی تحقیق میں انکشاف کیا گیا ہے کہ اسلام 2035 تک دنیا کا سب سے بڑا مذہب بن سکتا ہے اور مسلمانوں کی مجموعی تعداد عیسائیوں سے بڑھ جانے کا امکان ہے۔
پیو ریسرچ سینٹر کی جانب سے 18 نومبر 2026 کو جاری کردہ تفصیلی تخمینوں کے مطابق اس وقت عیسائیت دنیا کا سب سے بڑا مذہب ہے، جبکہ اسلام دوسرے نمبر پر ہے۔ تاہم آبادی میں اضافے کے موجودہ رجحانات برقرار رہے تو آئندہ نو برس میں یہ ترتیب تبدیل ہوسکتی ہے۔
رپورٹ کے مطابق 2020 میں دنیا بھر میں عیسائیوں کی تعداد تقریباً 2 ارب 27 کروڑ تھی، جبکہ مسلمانوں کی تعداد 2 ارب 2 کروڑ ریکارڈ کی گئی تھی۔ نئے تخمینوں میں 2035 تک مسلمانوں کی تعداد بڑھ کر 2 ارب 57 کروڑ اور عیسائیوں کی تعداد 2 ارب 52 کروڑ ہونے کا امکان ظاہر کیا گیا ہے۔
تحقیق کے مطابق دونوں مذاہب کے پیروکاروں کی تعداد میں اضافہ ہوگا، تاہم مسلم آبادی کی شرح نمو عیسائی آبادی کے مقابلے میں زیادہ تیز رہنے کی توقع ہے۔
مسلمانوں کی آبادی میں اضافے کی بڑی وجہ
پیو ریسرچ سینٹر کے مطابق مسلمانوں کی آبادی میں تیزی سے اضافے کی بنیادی وجوہات میں نسبتاً زیادہ شرح پیدائش اور مسلم آبادی کا نوجوان ہونا شامل ہیں۔
تحقیق کے مطابق 2020 سے 2025 کے دوران مسلمان خواتین میں فی خاتون بچوں کی اوسط شرح 3.1 رہی، جبکہ عیسائی خواتین میں یہ شرح 2.5 ریکارڈ کی گئی۔ دیگر مذاہب سے تعلق رکھنے والی خواتین میں یہ اوسط 1.6 تھی۔
ماہرین کے مطابق یہی فرق آنے والی دہائیوں میں مسلم آبادی کے تیزی سے بڑھنے میں اہم کردار ادا کرے گا۔ مذہب کی تبدیلی بھی آبادی کے اعدادوشمار پر اثر انداز ہوتی ہے، تاہم اس کا کردار شرح پیدائش کے مقابلے میں نسبتاً محدود ہے۔
مسلمانوں کی تعداد 2070 تک 3 ارب 64 کروڑ
رپورٹ میں 2070 کے حوالے سے بھی اہم تخمینہ پیش کیا گیا ہے۔ اس کے مطابق دنیا بھر میں مسلمانوں کی تعداد بڑھ کر 3 ارب 64 کروڑ تک پہنچ سکتی ہے، جبکہ عیسائیوں کی آبادی تقریباً 2 ارب 96 کروڑ رہنے کا امکان ہے۔
اس طرح 2070 تک دنیا کی مجموعی آبادی میں مسلمانوں کا تناسب تقریباً 35.8 فیصد اور عیسائیوں کا 29.1 فیصد ہوسکتا ہے۔
پاکستان دنیا کی سب سے بڑی مسلم آبادی والا ملک بن سکتا ہے
پیو ریسرچ سینٹر کی تحقیق میں پاکستان کے حوالے سے بھی ایک اہم تخمینہ سامنے آیا ہے۔ رپورٹ کے مطابق اگر موجودہ آبادیاتی رجحانات برقرار رہے تو پاکستان 2070 تک انڈونیشیا کو پیچھے چھوڑ کر دنیا کی سب سے بڑی مسلم آبادی والا ملک بن سکتا ہے۔
تحقیق میں پاکستان کی مسلم آبادی 2020 میں تقریباً 22 کروڑ 70 لاکھ بتائی گئی ہے، جو 2070 تک بڑھ کر 46 کروڑ 10 لاکھ ہونے کا امکان ہے۔ اس فہرست میں بھارت، نائیجیریا اور انڈونیشیا بھی بڑی مسلم آبادی رکھنے والے ممالک میں شامل ہوں گے۔
کیا عیسائیت کی آبادی کم ہوجائے گی؟
تحقیق کا ایک اہم پہلو یہ بھی ہے کہ اسلام کے دنیا کا سب سے بڑا مذہب بننے کا امکان عیسائیت کی مجموعی آبادی میں کمی کا نتیجہ نہیں ہوگا۔ پیو ریسرچ سینٹر کے مطابق دونوں مذاہب کے پیروکاروں کی تعداد میں اضافہ متوقع ہے، تاہم مسلمانوں کی آبادی نسبتاً زیادہ تیزی سے بڑھے گی۔
رپورٹ کے مطابق افریقہ کے خطے، خصوصاً صحارا کے جنوب میں واقع ممالک، مستقبل میں مسلمانوں اور عیسائیوں دونوں کی آبادی میں اضافے کا اہم مرکز ہوں گے۔ 2070 تک دنیا کے نصف سے زیادہ عیسائیوں کے اسی افریقی خطے میں آباد ہونے کا امکان ظاہر کیا گیا ہے۔
واضح رہے کہ پیو ریسرچ سینٹر کے یہ اعدادوشمار 2020 سے 2070 تک کے آبادیاتی رجحانات پر مبنی تخمینے ہیں، حتمی پیش گوئیاں نہیں۔ تحقیق میں دنیا کے 201 ممالک اور علاقوں کے اعدادوشمار، شرح پیدائش، عمر، اموات، نقل مکانی اور مذہب کی تبدیلی جیسے عوامل کو مدنظر رکھا گیا ہے۔


