دفتری کام کرنےوالے ہر گھنٹے بعد 5 منٹ چہل قدمی کریں اور بلڈشوگر گھٹائیں: امریکی تحقیق

نیویارک: دن بھر دفتر میں بیٹھ کر کام کرنا، مسلسل کمپیوٹر استعمال کرنا یا کئی گھنٹے ایک ہی جگہ گزارنا بظاہر معمول کی بات محسوس ہوتی ہے، لیکن طبی ماہرین طویل وقت تک مسلسل بیٹھے رہنے کو صحت کے لیے ایک اہم خطرہ قرار دیتے ہیں۔ اب ایک نئی تحقیق میں انکشاف ہوا ہے کہ مسلسل بیٹھنے کے دوران مختصر وقفوں سے چہل قدمی کرنا خون میں شوگر کی سطح کو متوازن رکھنے میں زیادہ فائدہ مند ہوسکتا ہے۔

تحقیق کے مطابق روزانہ 45 منٹ کی واک ایک ہی نشست میں مکمل کرنے کے بجائے اگر یہی وقت دن بھر میں مختصر وقفوں کی صورت میں تقسیم کردیا جائے تو جسم میں گلوکوز یعنی خون میں موجود شکر کو کنٹرول کرنے کے عمل میں بہتر نتائج حاصل ہوسکتے ہیں۔

طبی جریدے اوبیسٹی میں شائع ہوئی تحقیق میں بتایا گیا ہے کہ مسلسل بیٹھنے کے معمول کو مختصر واک کے ذریعے توڑنا بلڈ شوگر میں اتار چڑھاؤ کم کرنے اور اسے مطلوبہ حد میں رکھنے میں مددگار ثابت ہوسکتا ہے۔

تحقیق کیسے کی گئی؟

امریکا کی یونیورسٹی آف کولوراڈو اور دیگر تحقیقی اداروں کے ماہرین کی جانب سے کی گئی اس تحقیق میں 30 ایسے بالغ افراد کو شامل کیا گیا جو روزانہ چھ گھنٹے سے زیادہ بیٹھ کر گزارتے تھے اور جن کا وزن زیادہ یا موٹاپے کے زمرے میں تھا۔

شرکا کو دو گروپوں میں تقسیم کیا گیا اور چھ ہفتوں تک ان کی جسمانی سرگرمیوں اور خون میں گلوکوز کی سطح کا جائزہ لیا گیا۔

پہلے گروپ کو دن بھر بیٹھنے کے دوران وقفے وقفے سے تیز رفتار مختصر واک کرنے کی ہدایت کی گئی۔ اس گروپ نے روزانہ مجموعی طور پر تقریباً 45 منٹ، ہفتے میں پانچ دن چہل قدمی کی۔

دوسرے گروپ نے بھی اتنا ہی وقت اور ہفتے میں اتنے ہی دن واک کی، تاہم ان کے لیے 45 منٹ کی مسلسل واک کا معمول مقرر کیا گیا۔

اس طرح محققین یہ جاننا چاہتے تھے کہ اگر دونوں گروپ یکساں وقت تک جسمانی سرگرمی کریں تو کیا واک کو دن بھر میں تقسیم کرنے سے صحت پر زیادہ مثبت اثرات مرتب ہوتے ہیں؟

بلڈ شوگر کے نتائج سے محققین حیران

تحقیق کے نتائج میں دونوں گروپوں کے درمیان واضح فرق سامنے آیا۔

مسلسل بیٹھنے کے دوران وقفے وقفے سے واک کرنے والے گروپ میں بلڈ شوگر کی مطلوبہ حد میں رہنے کا دورانیہ 82 فیصد سے بڑھ کر 94 فیصد ہوگیا، جبکہ ایک ہی وقت میں 45 منٹ واک کرنے والے گروپ میں یہ شرح 89 فیصد سے کم ہوکر 80 فیصد رہ گئی۔

اس کے علاوہ وقفے وقفے سے واک کرنے والے افراد کے خون میں گلوکوز کی سطح میں اتار چڑھاؤ بھی کم ہوا، جس سے ظاہر ہوتا ہے کہ دن بھر مختصر جسمانی سرگرمیاں خون میں شوگر کو نسبتاً مستحکم رکھنے میں مدد دے سکتی ہیں۔

تاہم محققین نے واضح کیا کہ دونوں گروپوں میں انسولین کی حساسیت میں کوئی قابلِ ذکر تبدیلی سامنے نہیں آئی۔ اس لیے ان نتائج کو یہ سمجھنے کے لیے کافی نہیں قرار دیا جاسکتا کہ مختصر واک ذیابیطس کے خطرے کو یقینی طور پر کم کردیتی ہے۔

مسلسل بیٹھنے سے خون میں شوگر کا نظام متاثر

طبی تحقیق کے مطابق طویل وقت تک بیٹھے رہنے سے جسم کے بڑے عضلات غیر فعال رہتے ہیں، جس کے نتیجے میں ان کی توانائی کی ضرورت اور خون سے گلوکوز جذب کرنے کی سرگرمی کم ہوسکتی ہے۔

دوسری جانب جب انسان چلتا ہے تو ٹانگوں اور جسم کے دیگر عضلات میں حرکت پیدا ہوتی ہے۔ اس دوران عضلات خون میں موجود گلوکوز کو توانائی کے لیے استعمال کرتے ہیں۔ یہ عمل بعض صورتوں میں انسولین کی مدد کے بغیر بھی انجام پاتا ہے۔

اسی لیے ماہرین کا خیال ہے کہ دن بھر میں بار بار مختصر واک کرنے سے عضلات متحرک رہتے ہیں اور جسم کو خون میں موجود شوگر استعمال کرنے کے زیادہ مواقع ملتے ہیں۔

محققین کے مطابق مسلسل ورزش کرنے کے باوجود اگر کوئی شخص باقی پورا دن بیٹھ کر گزارتا ہے تو اسے جسمانی سرگرمی کے تمام ممکنہ فوائد حاصل نہیں ہو پاتے۔

ہر گھنٹے بعد کتنی دیر چلنا مفید

اس تحقیق میں مختصر واک کرنے والے افراد نے تقریباً ہر گھنٹے بعد پانچ منٹ کی تیز رفتار چہل قدمی کی اور نو گھنٹوں کے دوران مجموعی طور پر 45 منٹ واک مکمل کی۔

ماہرین کا کہنا ہے کہ اس کے لیے کوئی ایک سخت شیڈول ضروری نہیں۔ دفتر میں کام کرنے والے افراد میٹنگز کے درمیان تھوڑی دیر چہل قدمی کرسکتے ہیں، فون پر بات کرتے ہوئے پیدل چل سکتے ہیں یا کام کے دوران وقفے لے کر اپنی جگہ سے اٹھ کر حرکت کرسکتے ہیں۔

ہر 30 سے 60 منٹ بعد کچھ دیر کے لیے بیٹھنے کا سلسلہ توڑنا بھی ایک مفید ابتدائی عادت ہوسکتی ہے۔

امریکن ڈائبیٹیز ایسوسی ایشن بھی طویل وقت تک بیٹھنے کے دوران جسمانی سرگرمی کے مختصر وقفے لینے کی حوصلہ افزائی کرتی ہے۔ اس مقصد کے لیے پیدل چلنے کے علاوہ ہلکی پھلکی گھریلو سرگرمیاں، جگہ پر مارچ کرنا اور بچوں یا پالتو جانوروں کے ساتھ کھیلنا بھی شامل ہوسکتا ہے۔

مختصر واک باقاعدہ ورزش کا متبادل؟

تحقیق کے نتائج اگرچہ حوصلہ افزا ہیں، لیکن ماہرین واضح کرتے ہیں کہ دن بھر مختصر واک کرنے کا مطلب یہ نہیں کہ باقاعدہ ورزش کی ضرورت ختم ہوگئی ہے۔

منظم ورزش دل، پھیپھڑوں، پٹھوں اور مجموعی جسمانی صحت کے لیے اہم ہے۔ اس لیے باقاعدہ ورزش کے ساتھ طویل وقت تک مسلسل بیٹھنے سے گریز کرنا صحت کے لیے زیادہ بہتر حکمت عملی ہوسکتی ہے۔

تحقیق کی حدود بھی اہم ہیں

محققین نے اس تحقیق کے بعض محدود پہلوؤں کی بھی نشاندہی کی ہے۔ اس میں صرف 30 افراد شامل تھے اور تحقیق کا دورانیہ محض چھ ہفتے تھا۔ اس لیے یہ جاننے کے لیے مزید بڑے اور طویل المدتی مطالعات کی ضرورت ہے کہ آیا یہ فوائد طویل عرصے تک برقرار رہتے ہیں اور کیا ان سے ٹائپ ٹو ذیابیطس یا دل کی بیماریوں کا خطرہ بھی کم ہوتا ہے۔

اس کے علاوہ تحقیق میں شامل افراد نسبتاً کم عمر تھے اور ان کی اوسط عمر تقریباً 34 سال تھی، لہٰذا نتائج کو ہر عمر اور ہر طبی حالت کے حامل فرد پر یکساں طور پر لاگو نہیں کیا جاسکتا۔

مجموعی طور پر اس تحقیق کا اہم پیغام یہی ہے کہ صحت مند رہنے کے لیے صرف یہ دیکھنا کافی نہیں کہ آپ روزانہ کتنی دیر ورزش کرتے ہیں، بلکہ یہ بھی اہم ہے کہ باقی دن آپ کا زیادہ تر وقت کس طرح گزرتا ہے۔ یعنی ورزش کے ساتھ بیٹھنے کے طویل دورانیے کو توڑنا بھی صحت مند طرزِ زندگی کا حصہ ہونا چاہیے۔