وفاقی حکومت کا فرنٹیئر کانسٹیبلری (ایف سی)کو ملک گیر وفاقی سیکیورٹی فورس میں تبدیل کرنے کا فیصلہ کرلیا۔
میڈیارپورٹس کے مطابق ایف سی کو وفاقی سیکیورٹی فورس بنانے کےلئے فرنٹیئر کانسٹیبلری ایکٹ 1915 میں ترامیم کی جائیں گی۔ جس کے بعد پورے پاکستان میں اس کے دائرہ اختیار کو بڑھانے کے لیے ایک آرڈیننس جاری کیا جائے گا۔
ذرائع کے مطابق اس فورس کا نام بدل کر فیڈرل کانسٹیبلری رکھا جائے گا ۔ جسے چاروں صوبوں، اسلام آباد، آزاد جموں و کشمیر اور گلگت بلتستان میں کام کرنے کا اختیار ہو گا۔
آرڈیننس کے نفاذ کے بعد نئی فورس کے لیے ملک بھر میں بھرتی کی جائے گی اور اس کے ملک بھر میں دفاتر قائم کیے جائیں گے۔ تنظیم نو فریم ورک کے تحت فیڈرل کانسٹیبلری کی کمانڈ پولیس سروس آف پاکستان کے افسران کریں گے۔
میڈیا رپورٹس میں کہا گیا ہےکہ فیڈرل کانسٹیبلری کے قیام سے ملکی داخلی سلامتی اور امن او عامہ کے قیام میں خاطر خواہ مدد ملے گی، اس اقدام کو قومی سطح پر داخلی سلامتی کے طریقہ کار کو مضبوط اور مرکزی بنانے کی وسیع تر کوششوں کا حصہ قرار دیا جا رہا ہے۔
