امریکی محکمہ خارجہ نے کالعدم بلوچستان لبریشن آرمی (بی ایل اے) اور اس کے ذیلی گروپ مجید بریگیڈ کو غیر ملکی دہشت گرد تنظیم قرار دے دیا۔
امریکی محکمہ خارجہ کے بیان کے مطابق محکمہ خارجہ نے مجید بریگیڈ کو بی ایل اے کے پہلے سے موجود خصوصی طور پر نامزد عالمی دہشت گرد کے درجے میں بطور ضمنی نام شامل کیا ہے۔
بیان میں کہا گیا ہے کہ کہ بی ایل اے کو 2019 میں کئی دہشت گرد حملوں کے بعد خصوصی طور پر نامزد عالمی دہشت گرد قرار دیا گیا تھا۔2024 میں بی ایل اے نے کراچی ایئرپورٹ کے قریب اور گوادر پورٹ اتھارٹی کمپلیکس پر خودکش حملوں کی ذمہ داری قبول کی۔
امریکی محکمہ خارجہ کے اعلامیے میں مزید کہا گیا ہے کہ سنہ 2025 مارچ میں بی ایل اے نے کوئٹہ سے پشاور جانے والی جعفر ایکسپریس ٹرین کے اغوا کی ذمہ داری قبول کی، جس میں 31 عام شہری اور سکیورٹی اہلکار جان سے گئے اور 300 سے زائد مسافروں کو یرغمال بنایا گیا۔
اعلامیے میں کہا گیا ہے کہ محکمہ خارجہ کی آج کی کارروائی ٹرمپ انتظامیہ کی دہشت گردی کے خلاف عزم کی عکاسی کرتی ہے۔ دہشت گرد تنظیموں کو نامزد کرنا ہماری اس جدوجہد میں ایک اہم قدم ہے، اور یہ دہشت گردانہ سرگرمیوں کے لیے امداد کو روکنے کا مؤثر ذریعہ ہے۔یہ اقدامات امیگریشن اور نیشنلٹی ایکٹ کی دفعہ 219 (ترمیم شدہ) اور ایگزیکٹو آرڈر 13224 (ترمیم شدہ) کے تحت کیے گئے ہیں۔ غیرملکی دہشت گرد تنظیموں کی نامزدگیاں فیڈرل رجسٹر میں اشاعت کے بعد نافذ العمل ہوتی ہیں۔
