وزیراعظم شہباز شریف ںے کہا ہے کہ بھارت کی مسلسل اشتعال انگیزیوں اور بدلتے ہوئے علاقائی تناظر سے غافل نہیں رہ سکتے۔
یوم دفاع پاکستان کے موقع پر اپنے پیغام میں وزیراعظم نے کہا کہ 6 ستمبر ہماری قومی تاریخ میں بہادری، اتحاد اور عزم کے دن کے طور پر نقش ہے۔ ساٹھ سال قبل ہماری بہادر مسلح افواج نے عوام کے بھرپورتعاون سے دشمن کی جارحیت کو ناکام بناتے ہوئے ثابت کیا کہ پاکستان ایک بہادر قوم ہے جو اپنی خودمختاری اور سالمیت کے تحفظ کی مکمل صلاحیت رکھتی ہے۔
وزیر اعظم کا کہنا تھا کہ 1965 کا ناقابل تسخیر جذبہ آج بھی زندہ ہے جیسا کہ حالیہ معرکہ حق میں ایک بار پھر ہماری مسلح افواج اور عوام بیرونی جارحیت کے خلاف آہنی دیوار کی طرح ایک ساتھ کھڑے رہے۔
انہوں نے کہا کہ پاکستان کی مسلح افواج اور قانون نافذ کرنے والے اداروں نے اپنی استقامت اور قربانیوں سے فتنہ الخوارج اور فتنہ الہندوستان کی عفریت کو ختم کرنے میں بے پناہ پیش رفت کی ہے، اس مشن کی تکمیل تک قوم ان کے ساتھ مضبوطی سے کھڑی ہے۔
شہباز شریف نے کہا کہ اپنی دفاعی صلاحیتوں کو مضبوط اور جدید بنانے کے ساتھ ساتھ ریاستی سرپرستی میں ہونے والی دہشت گردی اور اپنی سرحدوں میں سرگرم غیر ملکی پراکسیوں کے دوہرے خطرے کا مقابلہ کرتے رہیں گے۔
