نیشنل سائبر کرائم انویسٹی گیشن اتھارٹی (این سی سی آئی اے)نے سوشل میڈیا پر غیر قانونی سرمایہ کاری اور جوا ایپلی کیشنز کی تشہیر کے الزام میں ملک کے معروف ترین سوشل میڈیا انفلوئنسرز رجب بٹ، انس علی اور ہریرہ کے خلاف مقدمات درج کر لیے ہیں۔
این سی سی آئی اے کے مطابق رجب بٹ، انس علی اور ہریرہ پر الزام ہے کہ انہوں نے سوشل میڈیا کے ذریعے عوام کو گمراہ کن معلومات فراہم کر کے انہیں غیر قانونی اور ممنوعہ بائنری ٹریڈنگ پلیٹ فارمز میں سرمایہ کاری پر آمادہ کیا۔
این سی سی آئی اے کی جانب سے مذکورہ افراد کو تین مرتبہ نوٹسز بھیجے گئے تاکہ وہ انکوائری میں شامل ہوں، تاہم ان کی جانب سے مسلسل عدم تعاون کا مظاہرہ کیا گیا۔ قانون کے تقاضے پورے کرنے اور انصاف کی فراہمی کو یقینی بنانے کے لیے متعلقہ افراد کو وطن واپس لانے کے لیے قانونی اقدامات کا آغاز کر دیا گیا ہے۔
این سی سی آئی اے کا کہنا ہے کہ سوشل میڈیا کے ذریعے عوام کو دھوکہ دینے اور مالی نقصان پہنچانے والے عناصر کے خلاف بلا امتیاز کارروائیاں جاری رہیں گی۔
