دو میچوں پر مشتمل ٹیسٹ سیریز کے پہلے میچ کے پہلے دن کے اختتام پر پاکستان نے جنوبی افریقا کے خلاف پانچ وکٹوں کے نقصان پر 313 رنز بنا لیے ہیں۔
پاکستان نے ٹاس جیت کر اپنی اننگز کا آغاز کیا تو عبداللہ شفیق اور امام الحق کریز پر اترے۔
پاکستان کو پہلا نقصان عبداللہ شفیق کی صورت میں اٹھانا پڑا، وہ محض دو رنز بنا کر کاگیسو ربادا کی گیند پر ایل بی ڈبلیو ہو کر پویلین لوٹ گئے۔
اس کے بعد امام الحق اور کپتان شان مسعود نے شاندار بیٹنگ کا مظاہرہ کرتے ہوئے دوسری وکٹ پر 150 رنز کی شراکت قائم کی۔
امام الحق نے پُراعتماد انداز میں بیٹنگ کا مظاہرہ کرتے ہوئے 93 رنز بنائے جن میں سات چوکے اور ایک چھکا شامل تھا۔ ان کے ساتھ شان مسعود نے بھی ذمہ دارانہ اننگز کھیلی اور نو چوکوں اور ایک چھکے کی مدد سے 76 رنز کے ساتھ ٹیم کی بنیاد مضبوط کی۔ سعود شکیل بغیر کھاتہ کھولے آؤٹ ہو گئے۔
بابر اعظم اچھی کارکردگی دکھانے میں ناکام رہے، وہ صرف 23 رنز بنا کر آؤٹ ہوئے۔ یوں 199 کے مجموعی سکور پر پاکستان کی آدھی ٹیم پویلین لوٹ گئی۔ پہلے روز کے اختتام پر محمد رضوان 62 اور سلمان علی آغا 52 رنز کے ساتھ کریز پر موجود تھے۔
جنوبی افریقا کی جانب سے سینوران موتھوسامی نے دو جبکہ کاگیسو ربادا، پرینلان سبرائین اور سائمن ہارمر نے ایک ایک وکٹ حاصل کی۔
