امریکہ کے صدر ڈونالڈ ٹرمپ کا ’امن ایوارڈ‘ حاصل کرنے کا خواب آخر کار شرمندۂ تعبیر ہو ہی گیا۔ انھیں نوبل امن انعام بھلے ہی نہیں مل پایا، لیکن فیفا کی طرف سے شروع کیے گئے نئے ’امن ایوارڈ‘ کو حاصل کرنے میں وہ کامیاب ہو گئے۔ ’فیفا عالمی کپ 2026‘ کے لیے ڈرا کے دوران ڈونالڈ ٹرمپ کو پہلے ’فیفا امن ایوارڈ‘ سے نوازا گیا۔
واشنگٹن ڈی سی کے کینیڈی سنٹر میں منعقد ایک تقریب میں ٹرمپ کو یہ ایوارڈ دیا گیا۔ اس تقریب میں انھیں گولڈ ٹرافی اور میڈل پیش کیا گیا۔ فیفا نے اِسی سال سے یہ ایوارڈ شروع کیا ہے، اور پہلا ایوارڈ ٹرمپ کے نام گیا ہے۔
فیفا نے یہ ایوارڈ ان لوگوں کو دینا شروع کیا ہے، جو دنیا میں امن پھیلانے اور لوگوں کو جوڑنے میں اہم کردار ادا کرتے ہیں۔ ٹرمپ اس ایوارڈ کو لینے والے پہلے شخص تو بن گئے ہیں، لیکن انھیں کئی محاذ پر تنقید کا سامنا بھی کرنا پڑ رہا ہے۔ غور کرنے والی بات یہ ہے کہ ٹرمپ کئی بار کھلے طور پر کہہ چکے ہیں کہ وہ نوبل امن انعام کے حقدار ہیں، حالانکہ وہ نوبل امن انعام حاصل کرنے میں ناکام رہے۔ اب انھوں نے فیفا امن ایوارڈ حاصل کر بہت خوش نظر آ رہے ہیں۔
ٹرمپ نے اس ایوارڈ کو لینے کے بعد کہا کہ یہ میری زندگی کا ایک عظیم اعزاز ہے۔ایوارڈ سے زیادہ ضروری یہ ہے کہ ہم نے کروڑوں زندگیاںبچائیں۔
