اداکار فیروز خان کی سابق اہلیہ علیزے سلطان نے کہا ہے کہ فیروز خان نے اپنے بچوں کو ساتھ رکھنے سے انکار کردیا ہے۔
علیزے سلطان کی فیروز خان سے 2018 میں شادی ہوئی تھی۔ ان کے 2 بچے سلطان اور فاطمہ ہیں۔ 2020 میں علیزے سلطان نے فیروز خان پر گھریلو تشدد کا الزام عائد کرتے ہوئے عدالت سے رجوع کیا تھا۔
طلاق کے بعد بچوں کی تحویل کے حوالے سے علیزے سلطان نے عدالت میں درخواست دائر کر رکھی ہے۔ اس وقت علیزے سلطان اپنی بیٹی فاطمہ کے ساتھ الگ رہائش پذیر ہیں، جبکہ بیٹا سلطان اپنے والد فیروز خان کے ساتھ رہتا ہے۔
گزشتہ کچھ برسوں سے علیزے سلطان اور فیروز خان کی دوسری بیوی کے درمیان سوشل میڈیا پر شدید قسم کی نوک جھونک جاری ہے۔
حال ہی میں علیزے سلطان نے ایک مختصر ویڈیو شیئر کی ہے، جس میں انہیں اپنی دوست کے ساتھ دیکھا جاسکتا ہے۔
مذکورہ ویڈیو کے کمنٹس میں ایک صارف نے علیزے کو تنقید کا نشانہ بناتے ہوئے سوال اٹھایا کہ ان کے پاس بچوں کے سردیوں کے کپڑوں کے پیسے نہیں ہیں۔
صارف کی تنقید پر دیگر صارفین نے علیزے کا دفاع کیا اور لکھا کہ بچوں کی ذمہ داری پوری کرنا صرف ماں کی نہیں بلکہ باپ کی بھی ذمہ داری ہے۔ صرف اس بنیاد پر کہ ایک عورت اپنی زندگی میں آگے بڑھ رہی ہے، اسے ہر وہ کام کرنے کا پابند نہیں بنایا جا سکتا جو بچوں کے والد کو کرنا چاہیے۔
علیزے سلطان نے بھی مذکورہ صارف کی تنقید کا جواب دیتے ہوئے لکھا کہ وہ (فیروز خان) تحویل لینا نہیں چاہتے۔ میں دو بار کوشش کر چکی ہوں، انہوں نے دونوں بچوں کو رکھنے سے انکار کردیا ہے۔
