پاکستان سپر لیگ (پی ایس ایل) کی دو نئی فرنچائزز کی فروخت کے لیے پاکستان کرکٹ بورڈ (پی سی بی) کی جانب سے جاری کیے گئے ٹینڈر کو شاندار ردِعمل ملا ہے۔ مقررہ وقت کے اندر 12 پارٹیوں نے باضابطہ طور پر بولیاں جمع کرا دیں۔
پی سی بی کے مطابق بولی دینے والوں کا تعلق پانچ مختلف ممالک پاکستان، امریکا، آسٹریلیا، کینیڈا اور متحدہ عرب امارات سے ہے، جو پی ایس ایل کی بڑھتی ہوئی عالمی مقبولیت اور مضبوط تجارتی حیثیت کا واضح ثبوت ہے۔
بورڈ کا کہنا ہے کہ بولی کے اس مرحلے کے نتائج 27 دسمبر کو جاری کیے جائیں گے، جبکہ اگلے مرحلے میں تکنیکی طور پر اہل قرار دیے جانے والے بولی دہندگان کو کھلے مقابلے کے ذریعے دو نئی ٹیمیں خریدنے کا موقع دیا جائے گا۔
یہ مرحلہ 8 جنوری کو اسلام آباد کنونشن سینٹر میں منعقد ہوگا۔ پی سی بی کے مطابق پورا عمل بین الاقوامی معیار کے مطابق شفاف اور مسابقتی انداز میں مکمل کیا جائے گا، تاکہ پاکستان سپر لیگ کے دائرہ کار اور ترقی کو مزید وسعت دی جا سکے۔
