چیئرمین پاکستان پیپلز پارٹی بلاول بھٹو زرداری نے کہا ہے کہ پاکستان کسی بھی دباؤ کے سامنے جھکنے والا نہیں اور نہ ہی کسی جارحیت کو برداشت کرے گا۔ ان کے مطابق قوم نے ثابت کیا ہے کہ وہ سمجھوتوں کے ذریعے نہیں بلکہ اتحاد اور عزم کے ذریعے آگے بڑھتی ہے۔
کراچی میں ’معرکۂ حق‘ کے عنوان سے منعقدہ تقریب سے خطاب کرتے ہوئے انہوں نے کہا کہ ایک سال پہلے ملک غیر یقینی کیفیت سے دوچار تھا، مگر آج قومی یکجہتی نے حالات کو بدل دیا ہے اور مخالفین کی تمام توقعات غلط ثابت ہو چکی ہیں۔
بلاول بھٹو کا کہنا تھا کہ دشمن نے پاکستان کو کمزور سمجھنے کی غلطی کی، جبکہ حقیقت میں قوم کے حوصلے اور اتحاد نے اسے ناکام بنایا۔ انہوں نے اس کامیابی کو صرف عسکری قوت نہیں بلکہ قومی ہم آہنگی اور اجتماعی عزم کا نتیجہ قرار دیا۔
انہوں نے مسلح افواج کی پیشہ ورانہ صلاحیتوں اور جرأت کو سراہتے ہوئے کہا کہ دفاعی محاذ پر کامیابی کے ساتھ ساتھ سفارتی سطح پر بھی پاکستان کا مؤقف بھرپور انداز میں پیش کیا گیا۔
چیئرمین پیپلز پارٹی نے ’معرکۂ حق‘ کو ملکی تاریخ کا اہم سنگ میل قرار دیتے ہوئے کہا کہ اب اصل ذمہ داری اس کامیابی کو مضبوط اور پائیدار مستقبل میں تبدیل کرنا ہے۔
انہوں نے مزید کہا کہ پاکستان خطے میں امن کا خواہاں ہے، تاہم یہ امن برابری، عزت اور باہمی احترام کی بنیاد پر ہونا چاہیے۔ ان کے مطابق ملک کے ہر خطے سے تعلق رکھنے والے عوام نے جس اتحاد کا مظاہرہ کیا، وہ قومی یکجہتی کی ایک مضبوط مثال ہے۔
