بالی ووڈ سپر اسٹار سلمان خان کی آئندہ ایکشن تھرلر فلم کے حوالے سے سرگرمیاں تیز ہو گئی ہیں۔ جنوبی بھارت کی معروف اداکارہ نین تارا کے ساتھ سلمان خان کی پہلی آن اسکرین جوڑی پر مبنی اس فلم کی شوٹنگ اب ممبئی کے علاقے باندرہ میں شروع ہونے جا رہی ہے۔
بھارتی میڈیاکے مطابق منالی میں ابتدائی شیڈول مکمل کرنے کے بعد فلم کی ٹیم 10 جون سے ممبئی میں نئے مرحلے کا آغاز کرے گی، جہاں سلمان خان اور نین تارا متعدد بڑے ایکشن سیکوئنسز کی عکس بندی کریں گے۔ ہدایت کار وامشی پیڈی پلی ان مناظر کو حقیقی شہری ماحول میں فلمانا چاہتے ہیں، اسی لیے باندرہ اور اس کے گردونواح کی مختلف حقیقی لوکیشنز کا انتخاب کیا گیا ہے۔
رپورٹس کے مطابق فلم میں سنسنی خیز تعاقب، گاڑیوں پر مبنی اسٹنٹس، کلوز کومبیٹ فائٹس اور ہجوم کے درمیان فلمائے جانے والے ہائی وولٹیج ایکشن مناظر شامل ہوں گے۔ نئے شیڈول کی خاص بات ایک بڑا ایکشن سیٹ پیس ہوگا جسے کہانی کا اہم موڑ قرار دیا جا رہا ہے۔ بتایا جاتا ہے کہ یہ منظر ایک تعاقب سے شروع ہو کر ایک بڑے تصادم میں تبدیل ہو جائے گا۔
فلم کے پروڈیوسر دل راجو اس پراجیکٹ کو پین انڈیا سطح پر پیش کرنے کی تیاری کر رہے ہیں، جبکہ ایکشن سیکشنز پر خصوصی توجہ دی جا رہی ہے۔ ممبئی کے بعد جولائی میں حیدرآباد میں فلم کا اگلا بڑا شیڈول متوقع ہے۔
ادھر سلمان خان کے منفرد لُکس کی تیاری کے لیے معروف میک اپ اور پروستھیٹکس ڈیزائنر پریتیشیل سنگھ کو بھی ٹیم کا حصہ بنایا گیا ہے۔ وہ فلم میں سلمان کے لیے کئی ایسے انداز تخلیق کر رہی ہیں جو مداحوں نے پہلے کبھی نہیں دیکھے۔
فلم کے میوزک کے حوالے سے بھی قیاس آرائیاں جاری ہیں اور اطلاعات ہیں کہ انیرودھ روی چندر اور تھمن ایس جیسے نام اس منصوبے سے وابستہ ہو سکتے ہیں، تاہم اس بارے میں باضابطہ اعلان ابھی نہیں کیا گیا۔
ٹریڈ رپورٹس کے مطابق فلم کا ممکنہ نام “دی میسنجرز” ہو سکتا ہے، لیکن فلم سازوں نے ابھی اس کی تصدیق نہیں کی۔ بتایا جا رہا ہے کہ یہ ایک انٹینس اسپائی ایکشن تھرلر ہوگی جو سلمان خان کی مشہور “ٹائیگر” سیریز سے بالکل مختلف انداز اور کہانی کے ساتھ پیش کی جائے گی۔
نین تارا کا کردار بھی صرف گلیمر تک محدود نہیں ہوگا بلکہ انہیں ایک مضبوط اور ایکشن سے بھرپور کردار میں دکھایا جائے گا۔ اپریل 2026 میں شروع ہونے والی اس فلم کی شوٹنگ کے بعد سے ہی یہ پراجیکٹ فلمی حلقوں اور شائقین کی توجہ کا مرکز بنا ہوا ہے، جبکہ اسے عید 2027 پر ریلیز کرنے کی منصوبہ بندی کی جا رہی ہے۔
