ویڈیو گیمز کی دنیا کے سب سے زیادہ منتظر منصوبوں میں شامل جی ٹی اے 6 ایک بار پھر خبروں کی زینت بن گیا ہے، کیونکہ اس کے پری آرڈرز جمعرات کی شب سے کھولے جا رہے ہیں۔ ماہرین کا خیال ہے کہ گیم کی باضابطہ ریلیز سے کئی ماہ قبل ہی یہ فروخت اور مقبولیت کے نئے عالمی ریکارڈ قائم کرنا شروع کر سکتا ہے۔
امریکی گیم ڈویلپر راک اسٹار گیمز کی جانب سے اعلان کیا گیا ہے کہ شائقین دنیا بھر میں مقامی وقت کے مطابق آدھی رات سے گیم کی ڈیجیٹل یا فزیکل کاپی بک کر سکیں گے، جبکہ گیم کی مکمل ریلیز 19 نومبر کو کنسول پلیٹ فارمز پر ہوگی۔
کئی سال کے طویل انتظار کے بعد آنے والا گرانڈ تھیفٹ آٹو 6 نہ صرف اس سال کا سب سے زیادہ فروخت ہونے والا تفریحی پروڈکٹ بن سکتا ہے بلکہ ماہرین کے مطابق یہ تاریخ کی سب سے بڑی انٹرٹینمنٹ لانچ بھی ثابت ہو سکتا ہے۔ بعض تجزیہ کاروں کا اندازہ ہے کہ گیم ریلیز سے پہلے ہی کروڑوں کاپیاں فروخت ہونے کی راہ پر گامزن ہوگا۔
کمپنی نے یہ بھی اعلان کیا ہے کہ گیم کی معیاری ایڈیشن کی قیمت امریکہ میں 79.99 ڈالر رکھی گئی ہے، جو موجودہ اے اے اے گیمز کی روایتی قیمت سے 10 ڈالر زیادہ ہے۔ اس کے علاوہ خصوصی الٹیمیٹ ایڈیشن 99.99 ڈالر میں دستیاب ہوگا، جس میں اضافی ہتھیار، گاڑیاں اور خصوصی مواد شامل ہوگا۔
مارکیٹ ماہرین کے مطابق اگر ابتدائی فروخت کے اندازے درست ثابت ہوئے تو جی ٹی اے 6 اپنے پیشرو گرانڈ تھیفٹ آٹو 5 کا ریکارڈ بھی توڑ سکتا ہے، جس نے محض تین دن میں ایک ارب ڈالر کی فروخت حاصل کر کے تاریخ رقم کی تھی۔ جی ٹی اے 5 اب تک تقریباً 230 ملین کاپیاں فروخت کر چکا ہے اور دنیا کے سب سے زیادہ فروخت ہونے والے گیمز میں دوسرے نمبر پر ہے، جبکہ پہلا نمبر مائن کرافٹ کے پاس ہے۔
نئے گیم کی کہانی ایک ایسی فرضی دنیا میں ترتیب دی گئی ہے جو امریکی شہر میامی اور ریاست فلوریڈا سے متاثر ہے۔ یہ وہی ماحول ہے جس نے 2002 کے مقبول عنوان گرانڈ تھیفٹ آٹو: وائس سٹیکو بھی شہرت دلائی تھی۔ اطلاعات کے مطابق گیم کے مرکزی کردار جیسن اور لوشیا ایک مشہور مجرمانہ جوڑی کے انداز میں پیش کیے جائیں گے، جنہیں امریکی تاریخ کی معروف شخصیتوں بونی پارکر اور کلائیڈ بیرو سے متاثر قرار دیا جا رہا ہے۔
جی ٹی اے سیریز اپنی کھلی دنیا، آزاد گیم پلے اور جرائم پر مبنی کہانیوں کی وجہ سے ہمیشہ مقبول رہی ہے، تاہم اسی وجہ سے اسے تنقید کا بھی سامنا رہا ہے۔ ناقدین کا مؤقف ہے کہ گیم میں جرائم، تشدد اور غیر قانونی سرگرمیوں کی عکاسی نوجوانوں پر منفی اثرات مرتب کر سکتی ہے۔ یہی وجہ ہے کہ یورپی درجہ بندی کے نظام کے تحت اس سیریز کے تمام بڑے عنوانات صرف 18 سال یا اس سے زیادہ عمر کے کھلاڑیوں کے لیے منظور شدہ ہیں۔
صنعتی ماہرین کے مطابق ایک سے دو ارب ڈالر کے تخمینی ترقیاتی اخراجات کے ساتھ جی ٹی اے 6 کو تاریخ کا مہنگا ترین تفریحی منصوبہ بھی قرار دیا جا رہا ہے، جس نے بڑے ہالی ووڈ منصوبوں کے بجٹ کو بھی پیچھے چھوڑ دیا ہے۔ یہی وجہ ہے کہ پوری گیمنگ انڈسٹری کی نظریں اب نومبر میں ہونے والی اس تاریخی ریلیز پر مرکوز ہیں۔
