ویمنز ٹی20 ورلڈ کپ میں انگلینڈ کے خلاف میچ کے دوران ویسٹ انڈیز کی کپتان ہیلی میتھیوز کا آؤٹ متنازعہ بن گیا، جہاں کیچ آؤٹ کے فیصلے پر ڈی آر ایس ٹیکنالوجی ایک بار پھر بحث کا موضوع بن گئی۔
میچ کے دوران انگلینڈ کی وکٹ کیپر ایمی جونز نے ہیلی میتھیوز کے خلاف کیچ کی اپیل کی، جسے فیلڈ امپائر نے ابتدائی طور پر مسترد کر دیا۔ تاہم انگلینڈ نے ریویو لینے کا فیصلہ کیا۔
ری پلے میں بیٹ اور گیند کے درمیان واضح رابطہ نظر نہیں آ رہا تھا، لیکن الٹرا ایج میں ایک اسپائیک دکھائی دیا، جس کی بنیاد پر تھرڈ امپائر نے فیصلہ تبدیل کرتے ہوئے میتھیوز کو آؤٹ قرار دے دیا۔
فیصلے کے بعد ویسٹ انڈیز کپتان میدان میں امپائرز سے گفتگو کرتی دکھائی دیں اور اپنی ناراضی کا اظہار کیا۔ بعد ازاں انہوں نے کہا کہ وہ امپائر کے فیصلے کا احترام کرتی ہیں، لیکن انہیں یقین تھا کہ گیند بیٹ سے نہیں لگی۔
ہیلی میتھیوز کا کہنا تھا کہ شاٹ کھیلتے وقت انہوں نے آواز ضرور سنی مگر انہیں لگا کہ یہ بیٹ کے کسی اور حصے کی آواز ہو سکتی ہے۔ ان کے مطابق ویڈیو میں بیٹ اور گیند کے درمیان فاصلہ دکھائی دے رہا تھا، تاہم تھرڈ امپائر نے دستیاب ٹیکنالوجی کی بنیاد پر فیصلہ کیا۔
یہ واقعہ ایج ڈیٹیکشن ٹیکنالوجی کے حوالے سے جاری بحث کو دوبارہ سامنے لے آیا ہے، کیونکہ اس سے قبل بھی اس نظام پر سوالات اٹھتے رہے ہیں۔
میچ میں انگلینڈ نے ویسٹ انڈیز کو 38 رنز سے شکست دی۔ اس کے باوجود ویسٹ انڈیز گروپ میں مضبوط پوزیشن پر موجود ہے اور آخری میچ میں کامیابی اسے سیمی فائنل میں پہنچا دے گی۔
میتھیوز نے اپنی بیٹنگ فارم پر بھی بات کرتے ہوئے کہا کہ انہیں مزید رنز بنانے کی ضرورت ہے، تاہم ٹیم کی کارکردگی اس بات کی علامت ہے کہ اب صرف چند کھلاڑیوں پر انحصار نہیں رہا۔
