بالی ووڈ کی مقبول ترین فلمی سیریز منّا بھائی کے تیسرے حصے کا انتظار کرنے والے مداحوں کے لیے ہدایت کار راج کمار ہیرانی نے اہم وضاحت کرتے ہوئے بتایا ہے کہ فلم کی کہانی پر کام جاری ہے، مگر وہ اب تک ایسی اسکرپٹ کو حتمی شکل نہیں دے سکے جو اس کامیاب فرنچائز کے معیار پر پوری اتر سکے۔
منّا بھائی ایم بی بی ایس اور لگے رہو منّا بھائی نہ صرف باکس آفس پر کامیاب رہیں بلکہ بالی ووڈ کی یادگار کامیڈی ڈراما فلموں میں بھی شمارہوتی ہیں۔ ایک حالیہ انٹرویو میں راج کمار ہیرانی نے کہا کہ منّا بھائی 3 کے لیے ان کے پاس تین مختلف اسکرپٹس موجود ہیں، لیکن ان میں سے کوئی بھی مکمل طور پر مطمئن نہیں کرتی۔ ان کے مطابق فلم بنانا مشکل نہیں، اصل چیلنج ایسی کہانی پیش کرنا ہے جو پہلی دو فلموں کی کامیابی اور معیار کو برقرار رکھ سکے۔
انہوں نے کہا کہ اگر مقصد صرف باکس آفس پر کمائی کرنا ہوتا تو وہ اب تک اس سیریز کی کئی فلمیں بنا چکے ہوتے، لیکن وہ صرف اسی صورت میں نئی فلم بنانا چاہتے ہیں جب اس کی کہانی واقعی منفرد اور مضبوط ہو۔
راج کمار ہیرانی کے مطابق ان کے پاس فلم کے ابتدائی حصے کے لیے کئی دلچسپ خیالات موجود ہیں، مگر کہانی کو اختتام تک مؤثر انداز میں پہنچانے والا وہ اہم عنصر ابھی تک نہیں مل سکا، جس کی وجہ سے منصوبہ مسلسل مؤخر ہو رہا ہے۔
دوسری جانب اداکار ارشد وارثی، جو فلم میں سرکٹ کے کردار سے شہرت رکھتے ہیں، نے بھی اس بات کی تصدیق کی کہ تینوں اسکرپٹس میں شاندار مناظر اور دلچسپ خیالات موجود ہیں، تاہم ہر کہانی میں ایک ایسا اہم ربط یا اختتامی کڑی غائب ہے جو اسے مکمل بنا سکے۔
انہوں نے امید ظاہر کی کہ جیسے ہی وہ آخری ٹکڑا اپنی جگہ آ جائے گا، منّا بھائی پر کام تیزی سے آگے بڑھے گا اور مداحوں کا طویل انتظار ختم ہو جائے گا۔
