وزارتِ اطلاعات و نشریات نے کہا ہے کہ سیکیورٹی فورسز نے خیبر پختونخوا کے مختلف علاقوں اور افغانستان سے ملحقہ سرحدی پٹی میں دہشت گردوں کے خلاف کارروائیوں کے دوران 37 افراد کو ہلاک کیا ہے۔
وزارتِ اطلاعات کے مطابق کارروائیوں کا ایک مرحلہ 20 ستمبر کو کوہاٹ اور ہنگو میں انٹیلیجنس اطلاعات کی بنیاد پر کیا گیا، جہاں 9 افراد ہلاک اور متعدد زخمی ہوئے۔
حکومت کے مطابق کارروائیوں کا دائرہ افغانستان کے ساتھ سرحدی علاقوں تک بھی پھیلایا گیا، جہاں دہشت گردوں کے کیمپوں اور مبینہ محفوظ ٹھکانوں کو فضائی کارروائیوں کا نشانہ بنایا گیا۔ وزارتِ اطلاعات کا کہنا ہے کہ اس دوران 3 اہداف تباہ کیے گئے۔
بیان کے مطابق نشانہ بنائے گئے مقامات میں خودکش حملہ آوروں کی تربیت کا ایک مرکز بھی شامل تھا۔ حکومت کا دعویٰ ہے کہ ان کارروائیوں میں متعدد خودکش بمباروں سمیت 28 دہشت گرد مارے گئے جبکہ وہاں ذخیرہ کیا گیا اسلحہ اور گولہ بارود بھی تباہ ہوا۔
وزارتِ اطلاعات نے ان کارروائیوں کو پاکستان کو درپیش دہشت گردی کے خطرے کے تناظر میں قرار دیتے ہوئے کہا ہے کہ حکومت کے مطابق دہشت گردی کے مراکز افغانستان میں موجود ہیں اور وہاں سے پاکستان کو خطرہ لاحق ہے۔
حکومت کا کہنا ہے کہ کارروائیوں کے دوران شہریوں کو ممکنہ نقصان سے بچانے کے لیے احتیاطی تدابیر اختیار کی گئیں، جبکہ ملک میں انسدادِ دہشت گردی کی مہم ’غضب الحق‘ آئندہ بھی جاری رکھنے کا اعلان کیا گیا ہے۔
