میکسیکو سٹی: میکسیکو میں 12 سال قبل لاپتا ہونے والے 43 ٹرینی اساتذہ کے طلبہ کا معمہ ایک بار پھر احتجاج کی صورت میں دارالحکومت کی سڑکوں پر آگیا، ہزاروں افراد نے مظاہرے میں شرکت کرکے حکومت سے طلبہ کے بارے میں مکمل سچ سامنے لانے کا مطالبہ کردیا۔
میکسیکو سٹی میں ہونے والے احتجاج میں مظاہرین نے سرخ لباس پہن رکھے تھے جبکہ بعض افراد نے علامتی تابوت بھی اٹھا رکھے تھے۔ مظاہرین نے لاپتا ہونے والے 43 طلبہ کی یاد میں نعرے لگائے اور حکومت سے مطالبہ کیا کہ ان کے بارے میں حقیقت عوام کے سامنے لائی جائے۔
احتجاج کی قیادت ان طلبہ کے والدین نے کی، جو 12 سال سے اپنے پیاروں کے بارے میں جواب کے منتظر ہیں۔ مظاہرین جلوس کی شکل میں دارالحکومت کے مرکزی چوک تک پہنچے، جہاں میکسیکو کا حکومتی محل واقع ہے۔
یہ واقعہ 26 ستمبر 2014 کو پیش آیا تھا، جب ریاست گیریرو کے ایک دیہی اساتذہ کالج کے 43 طلبہ میکسیکو سٹی میں ہونے والے ایک احتجاج میں شرکت کے لیے روانہ ہوئے تھے۔
طلبہ کو میکسیکو کے شہر ایگوالا میں مقامی پولیس نے روک لیا۔ اس دوران ہونے والی جھڑپوں میں 6 افراد ہلاک ہوئے جبکہ 43 طلبہ بعد میں لاپتا ہوگئے۔
واقعے کے ابتدائی سرکاری مؤقف کے مطابق پولیس اہلکاروں نے طلبہ کو منشیات کے ایک گروہ کے ارکان کے حوالے کیا، جنہوں نے انہیں قتل کرنے کے بعد شواہد مٹانے کی کوشش کی۔
تاہم انسانی حقوق کے آزاد ماہرین نے اس سرکاری وضاحت کے اہم حصوں کو مسترد کردیا تھا۔ یہی وجہ ہے کہ 12 سال گزرنے کے باوجود یہ کیس مکمل طور پر حل نہیں ہوسکا اور لاپتا طلبہ کے خاندان آج بھی حقیقت جاننے کے لیے جدوجہد کررہے ہیں۔
والدین کا ایک ہی مطالبہ: سچ سامنے لایا جائے
احتجاج میں شریک لاپتا طلبہ کے والدین نے کہا کہ برسوں گزرنے کے باوجود ان کی تکلیف ختم نہیں ہوئی۔
لاپتا طلبہ کے والدین میں شامل ایسٹانیسلاو مینڈوزا نے کہا کہ وہ 12 سال سے تکلیف، تھکن اور مایوسی کا سامنا کررہے ہیں، تاہم ان کی بنیادی خواہش اب بھی یہی ہے کہ انہیں اپنے بچوں کے بارے میں حقیقت معلوم ہو۔
مظاہرین کی جانب سے اٹھائے گئے بینرز پر بھی اسی مطالبے کی عکاسی کی گئی۔ ایک نعرے میں کہا گیا کہ اگر طلبہ کو زندہ لے جایا گیا تھا تو انہیں زندہ واپس لایا جائے۔
مظاہرین نے 43 طلبہ کو خراج عقیدت پیش کرنے کے لیے کئی مرتبہ اجتماعی طور پر ایک سے 43 تک گنتی بھی کی۔
ان43 طلبہ کا کیس میکسیکو میں لاپتا افراد کے وسیع تر بحران کی علامت بھی بن چکا ہے۔ دستیاب اعداد و شمار کے مطابق ملک میں ایک لاکھ 34 ہزار سے زیادہ افراد لاپتا افراد کی فہرست میں شامل ہیں۔
