بھارت کے لیگ اسپنر یوزویندر چہل نے فرسٹ کلاس کرکٹ سے ریٹائرمنٹ کا اعلان کردیا ہے۔
یوزویندر چہل نے سوشل میڈیا پر اپنے پیغام میں کہا کہ ریڈ بال کرکٹ ان کے لیے محض ایک فارمیٹ نہیں تھی بلکہ اسی کھیل نے انہیں صبر، کردار، ثابت قدمی اور طویل جدوجہد کی اہمیت سکھائی۔
انہوں نے بتایا کہ لارڈز میں کھیلا گیا میچ ان کا آخری فرسٹ کلاس مقابلہ تھا۔ ٹیسٹ کیپ ان کا ہمیشہ سے خواب رہی، جسے وہ کئی برسوں تک اپنے ساتھ لے کر چلے، تاہم یہ خواب پورا نہ ہوسکا۔
فرسٹ کلاس کرکٹ کو الوداع کہتے ہوئے چہل نے واضح کیا کہ ان کا بین الاقوامی کیریئر ختم نہیں ہوا۔
ان کا کہنا تھا کہ بھارت کے لیے کھیلنے کی خواہش اب بھی پوری طرح موجود ہے اور انہیں یقین ہے کہ ان کے اندر اب بھی کرکٹ باقی ہے۔ وہ ون ڈے اور ٹی20 فارمیٹ میں دوبارہ موقع حاصل کرنے کے لیے اپنی پوری کوشش کریں گے۔
یوزویندر چہل نے بھارت کی جانب سے 72 ون ڈے اور 80 ٹی20 انٹرنیشنل کھیلے ہیں، تاہم وہ کبھی ٹیسٹ میچ میں بھارت کی نمائندگی نہیں کرسکے۔ ان کا آخری بین الاقوامی میچ اگست 2023 میں ٹی20 انٹرنیشنل تھا۔
ان کا آخری فرسٹ کلاس مقابلہ برطانیہ کی کاؤنٹی کرکٹ میں مڈل سسیکس کے خلاف لارڈز میں ہوا، جس میں مڈل سسیکس نے نارتھمپٹن شائر کو سات وکٹوں سے شکست دے کر اس کی ترقی کی امیدیں ختم کردیں۔
فرسٹ کلاس کرکٹ چھوڑنے کے باوجود چہل محدود اوورز کی کرکٹ کھیل رہے ہیں۔ وہ سید مشتاق علی ٹی20 ٹورنامنٹ میں حالیہ سیزنز میں ایکشن میں رہے ہیں۔
ون ڈے کرکٹ میں ان کی آخری وجے ہزارے ٹرافی شرکت 2023-24 میں ہوئی، جب انہوں نے 18 وکٹیں 14.83 کی اوسط سے حاصل کرکے ہریانہ کو ٹائٹل جتوانے میں اہم کردار ادا کیا۔
اس کے بعد بھی وہ ون ڈے کرکٹ سے مکمل طور پر دور نہیں ہوئے اور گزشتہ تین سیزنز میں نارتھمپٹن شائر کی جانب سے ون ڈے کپ میں کھیلتے رہے ہیں۔
آئی پی ایل میں سب سے زیادہ وکٹیں
یوزویندر چہل کی محدود اوورز کی کرکٹ میں سب سے نمایاں شناخت آئی پی ایل سے ہے۔ وہ لیگ کی تاریخ میں سب سے زیادہ وکٹیں لینے والے بولر ہیں اور اس وقت پنجاب کنگز کی نمائندگی کر رہے ہیں۔
بھارتی سلیکٹرز کی جانب سے نظر انداز کیے جانے کے باوجود چہل نے اپنی محدود اوورز کی کرکٹ جاری رکھی ہوئی ہے۔ فرسٹ کلاس کرکٹ سے ریٹائرمنٹ کے بعد ان کی توجہ اب واضح طور پر ون ڈے اور ٹی20 میں دوبارہ بھارت کی نمائندگی حاصل کرنے پر مرکوز ہوگی۔
