ریاض: پرتگال کے عالمی شہرت یافتہ فٹبالر کرسٹیانو رونالڈو نے سعودی عرب میں حالیہ حوثی حملوں کے بعد مملکت کے ساتھ اظہارِ یکجہتی کیا، میچ سے قبل سعودی نشان کو بوسہ دیا جبکہ مقابلے کے بعد سعودی پرچم والا اسکارف اپنے کندھوں پر اوڑھ لیا۔
رونالڈو نے یہ اظہارِ یکجہتی پیر کو ریاض میں النصر اور ازبکستان کی ٹیم نیفچی فرغانہ کے درمیان ایشین چیمپئنز لیگ کے میچ کے موقع پر کیا۔ حوثی حملوں کے باعث پیدا ہونے والی سکیورٹی صورتحال کے سبب میچ بھی مقررہ وقت پر شروع نہ ہوسکا اور تقریباً ایک گھنٹے کی تاخیر سے کھیلا گیا۔
میچ شروع ہونے سے کچھ دیر قبل سعودی سول ڈیفنس کی جانب سے ریاض کی طرف آنے والے میزائل کے حوالے سے سکیورٹی الرٹ جاری کیا گیا تھا۔ سعودی قیادت میں اتحاد نے بعد میں میزائل کو روکنے اور تباہ کرنے کی اطلاع دی، جس کے بعد خطرہ ٹلنے پر میچ شروع کیا گیا۔
النصر نے نیفچی فرغانہ کو 3-1 سے شکست دی۔ رونالڈو نے بھی ٹیم کی کامیابی میں اہم کردار ادا کرتے ہوئے گول اسکور کیا۔ مقابلے کے اختتام پر وہ سعودی پرچم والے اسکارف کے ساتھ نظر آئے اور ساتھی کھلاڑیوں کے ہمراہ شائقین کا شکریہ ادا کیا۔
رونالڈو نے میچ سے قبل اپنے النصر کی شرٹ پر موجود سعودی نشان کو بھی بوسہ دیا، جسے سعودی عرب کے ساتھ ان کی حمایت اور یکجہتی کے اظہار کے طور پر دیکھا گیا۔ النصر نے بعد میں اپنے عربی سوشل میڈیا اکاؤنٹ پر رونالڈو کے ایک سابق انٹرویو کا حوالہ بھی شیئر کیا، جس میں پرتگالی اسٹار نے سعودی عرب سے اپنی وابستگی کا اظہار کیا تھا۔
یہ واقعہ ایسے وقت میں سامنے آیا ہے جب سعودی عرب کو حالیہ دنوں میں حوثیوں کی جانب سے میزائل اور ڈرون حملوں کا سامنا ہے۔ ریاض کے کنگ خالد انٹرنیشنل ایئرپورٹ کو بھی نشانہ بنایا گیا، جس کے نتیجے میں جانی نقصان ہوا اور فضائی سرگرمیاں متاثر ہوئیں۔
رونالڈو کے علاوہ سعودی لیگ سے وابستہ دیگر فٹبالرز نے بھی حملوں پر افسوس اور سعودی عوام سے یکجہتی کا اظہار کیا ہے۔ النصر کے مقابلے کے دوران سکیورٹی خدشات کے باوجود میچ کا انعقاد اور رونالڈو کا سعودی پرچم کے ساتھ میدان میں نظر آنا سوشل میڈیا پر بھی توجہ کا مرکز بن گیا۔
