پشاور کی عدالت نے عوامی نیشنل پارٹی کے سربراہ اسفندیار ولی خان کی پاکستان تحریک انصاف کے رہنما وزیر شوکت یوسفزئی کے خلاف ہتک عزت کی درخواست منظور کرتے ہوئے انہیں 15 کروڑ روپے بطور ہرجانہ ادا کرنے کا حکم دے دیا ہے۔
پی ٹی آئی کے سابق دور حکومت میں شوکت یوسفزئی نے اسفندیار ولی پر 25 ملین ڈالر میں پختونوں کا سودا کرنے کا الزام لگایا تھا۔ جس پر 2019 میں اسفندیار ولی خان نے شوکت یوسفزئی کے خلاف ہرجانے کا کیس دائر کیا تھا۔
شوکت یوسفزئی کی عدالت میں عدم پیشی پر پشاور کے ایڈیشنل ڈسٹرکٹ اینڈ سیشن جج نے یک طرفہ کارروائی کرتے ہوئے درخواست کا فیصلہ سنادیا۔
عدالت نے اپنے فیصلے میں قرار دیا کہ مسلسل طلبی کے باوجود شوکت یوسفزئی پیش نہیں ہوئے۔ اس لئے اسفندیار ولی کا دعویٰ درست قرار دیا جاتا ہے۔ اسفند یار ولی خان کی ساکھ کو متاثر کرنے پر شوکت یوسفزئی انہیں 15 کروڑ روپے ہرجانہ ادا کریں۔
