اسلام آباد ہائی کورٹ نے پاکستان تحریک انصاف کو وفاقی دارالحکومت میں جلسے کے انعقاد سے متعلق درخواست کی سماعت میں انتظامیہ کو ہدایت کی ہے کہ وہ اپنے قواعد و ضوابط پر عمل درآمد کروا کے انھیں جلسے کی اجازت دے دی۔
ڈی سی اسلام آباد نے پی ٹی آئی کی جلسے کی اجازت سے متعلق درخواست مسترد کردی تھی جس پر تحریک انصاف نے معاملہ اسلام آباد ہائی کورٹ میں چیلنج کیا تھا۔
چیف جسٹس اسلام آباد ہائیکورٹ جسٹس عامر فاروق پی ٹی آئی کی درخواست پر سماعت کی۔
پی ٹی آئی کی جانب سے شیر افضل مروت پیش ہوئے۔ انہوں نے موقف اختیار کیا کہ تحریک انصاف اب چھ اپریل کو اسلام آباد میں جلسہ کرنا چاہتی ہے لیکن اجازت نہیں دی جارہی۔
اسٹیٹ کونسل نے عدالت کو بتایا کہ سیکیورٹی خدشات کے باعث جلسے کی اجازت نہیں دی گئی تھی، گزشتہ روز دہشت گردی کا ایک افسوس ناک واقعہ بھی پیش آیا ہے۔ یہ پہلے بھی اجازت ملنے کے بعد خلاف ورزی کرچکے ہیں۔
چیف جسٹس اسلام آباد ہائیکورٹ نے ریمارکس دیئے کہ زندگی رکتی تو نہیں ہے، چلتی رہتی ہے، ہم نے اسی طرح دہشت گردی کا خاتمہ کرنا ہے۔ جلسے سب نے کیے ہیں، انتظامیہ قواعد و ضوابط اور شرائط طے کر لے اور ان پر عمل درآمد کروا کے جلسے کی اجازت دے دے۔
جسٹس عامر فاروق نے کہا کہ جو شرائط نارمل ہوتی ہیں وہ لگائیں، اس میں کوئی حرج نہیں، غیر معمولی شرائط عائد نہ ہوں، جو اسٹینڈرڈ ٹی او آر ہوتے ہیں اس کے مطابق اجازت دیں، پہلے والے چیف جسٹس بھی اجازت دیتے رہے ہیں، میں نے بھی آرڈر کیا ہے۔
