اقوام متحدہ کی جنرل اسمبلی نے فلسطین کے دو ریاستی حل کے لیے ’نیویارک اعلامیے‘ کی توثیق کردی۔
بی بی سی کے مطابق 7 صفحات پر مشتمل ’نیویارک ڈیکلیئریشن‘ رواں سال جولائی میں فرانس اور سعودی عرب کی میزبانی میں ہونے والی اقوام متحدہ کی عالمی کانفرنس کے بعد سامنے آیا ہے ۔ امریکہ اور اسرائیل نے اس کانفرنس میں شرکت نہیں کی تھی۔
اقوام متحدہ کی جنرل اسمبلی کے اجلاس میں قرارداد پیش کی گئی،جس میں حماس کے اسرائیل کے خلاف سات اکتوبر کے حملے مذمت اور حماس سے فوری ہتھیار پھینکنے کا مطالبہ کیا گیا ہے۔
قرارداد میں غزہ کی ناکہ بندی، شہریوں اوراملاک پر اسرائیلی حملے اور فاقہ کشی کے مذمت کی گئی اور غزہ میں اقوامِ متحدہ کی سلامتی کونسل کے تحت عارضی طور پر بین الاقوامی استحکام مشن کی تعیناتی کی حمایت کی ہے۔
جنرل اسمبلی اجلاس میں قراراداد کے حق میں 142 ممالک نے ووٹ دیا جبکہ امریکا اور اسرائیل سمیت 10 ممالک نے اس کی مخالفت کی۔
اقوام متحدہ کی قرارداد میں ’نیویارک ڈیکلیئریشن‘ کی توثیق کرتے ہوئے غزہ جنگ فوری بند کرنے کا مطالبہ کیا گیا ہے۔
امریکانے اقوامِ متحدہ کی اس قرارداد کو ’گمراہ کن اور غیر وقتی تشہیری کوشش‘ قرار دیا جو تنازعے کو ختم کرنے کی سنجیدہ سفارتی کوششوں کو نقصان پہنچائے گا۔
