پاکستانی ڈراموں کی مقبول اداکارہ ہانیہ عامر کا کہناہےکہ زندگی کی ہر مشکل، دل ٹوٹنے اور ہر خبر نے انہیں وہ بنایا جو وہ آج ہیں اور اس نے ان کی شخصیت کو مضبوط بنایا۔
اداکارہ ہانیہ عامر کو شوبز انڈسٹری میں 9 سال مکمل ہوگئے۔ اس دوران انہوں نے کئی اپنے کیرئیر اور ذاتی زندگی میں عروج و زوال دیکھا۔
حال ہی میں اداکارہ نے انسٹاگرام پر ایک ویڈیو جاری کی ہے، جس میں انہوں نے بتایا کہ 9برسوں کےدوران انہوں نے بہت کچھ سیکھا ہے۔
ہانیہ عامر کے مطابق جب انہوں نے انڈسٹری میں قدم رکھا تھا، انہیں بالکل اندازہ نہیں تھا کہ لاکھوں لوگوں کی نظروں کے سامنے ہونا کیسا ہوتا ہے، اس وقت وہ غلطیوں سے سیکھ رہی تھیں، بغیر یہ جانے کہ زندگی انہیں کہاں لے جائے گی۔
اداکارہ نے کہا کہ زندگی میں بہت کچھ بدل سکتا ہے، لیکن انسان کو اپنی اصل شخصیت نہیں بدلنی چاہیے، انہوں نے ہمیشہ یہ انتخاب کیا کہ اپنی جگہ خود بنائیں، زور سے ہنسیں اور نڈر رہیں۔
ان کا کہناتھاکہ انہیں انڈسٹری میں بحیثیت عورت کئی مشکلات آتی ہیں، لوگ توقع کرتے ہیں کہ عورت نازک ہو لیکن شور نہ مچائے، خوبصورت ہو لیکن بولڈ نہ ہو، ہر کوئی چاہتا ہے کہ آپ ایک باکس میں فٹ ہوں، لیکن اپنا مقام خود بنانے والی عورت کے لیے یہ ممکن نہیں۔
اداکارہ نے کہا کہ انہوں نے سیکھا کہ زندگی رکتی نہیں۔ اچھا برا وقت آتا ہے اور گزر جاتا ہے، اس لیے انسان کو ہمیشہ آگے بڑھتے رہنا چاہیے، سب سے اہم بات یہ ہے کہ زندگی میں ہمیشہ مثبت رہیں، اگرآپ کے اطراف میں شور ہو تو بھی اپنی پہچان نہ کھوئیں۔
