وزیراعظم محمد شہباز شریف کا کہنا ہے کہ سیاسی ڈائیلاگ کی آڑ میں امن و امان کی صورتحال خراب کرنے کی کسی بھی مذموم کوشش کو کامیاب نہیں ہونے دیا جائے گا۔
وفاقی کابینہ کے اجلاس سے گفتگو کرتے ہوئے وزیراعظم نے کہا کہ حکومتِ پاکستان ملکی ترقی، خوشحالی اور سیاسی ہم آہنگی کے لیے تمام سیاسی جماعتوں سے پرامن ڈائیلاگ کے اصولی مؤقف پر قائم ہے۔ انہوں نے کہا کہ وہ ذاتی طور پر متعدد بار تمام سیاسی جماعتوں کو مذاکرات کی پیشکش کر چکے ہیں، تاہم سیاسی ڈائیلاگ کی آڑ میں امن و امان کی صورتحال خراب کرنے کی کسی بھی مذموم کوشش کو کامیاب نہیں ہونے دیا جائے گا۔
وزیراعظم نے کہا کہ پاکستان انٹرنیشنل ایئرلائن (پی آئی اے) کی شفاف، مستند اور قابلِ اعتبار نجکاری کے عمل کو یقینی بنانے کے لیے حکومت ہر ممکن اقدامات کر رہی ہے۔ انہوں نے انڈر 19 کرکٹ ٹیم کو چیمپین شپ جیتنے پر پوری قوم کی جانب سے مبارک باد بھی پیش کی۔
اعلامیے کے مطابق وفاقی کابینہ نے پٹرولیم ڈویژن کی سفارش پر آف گرڈ پاور پلانٹس لیوی ایکٹ 2025 کی توسیع کی منظوری دے دی، جس کے تحت اب تیسرے فریق کی جانب سے کیپٹیو پاور پلانٹس کو گیس کی فروخت پر بھی لیوی لاگو ہو گی۔
وفاقی کابینہ نے پبلک ٹینڈرنگ اور پروکیورمنٹ کے تمام مراحل کو جدید تقاضوں سے ہم آہنگ کرنے کے لیے پبلک پروکیورمنٹ ریگولیٹری اتھارٹی (پی پی آر اے) آرڈیننس 2002 میں ترامیم کی اصولی منظوری بھی دے دی۔
اجلاس میں نیشنل یونیورسٹی فار سیکیورٹی سائنسز اسلام آباد 2025 کے بل کی تنسیخ کی منظوری دی گئی، جبکہ قومی اسمبلی میں پرائیویٹ ممبرز بلز اور دیگر قانون سازی پر مؤثر مشاورت کے لیے ایک خصوصی کمیٹی بھی تشکیل دے دی گئی۔
وفاقی کابینہ نے نیشنل کینبیز کنٹرول اینڈ ریگولیٹری پالیسی 2025 کی منظوری دے دی، جس کا مقصد ملک میں فارماسوٹیکل اور ٹیکسٹائل سیکٹر میں نباتاتی پودوں کے استعمال کو فروغ دینا ہے۔
اس کے علاوہ وزارت داخلہ کی سفارش پر ویزا کلیئرینس نظام کی منظوری بھی دی گئی، جس کا مقصد بیرون ملک جانے والے پاکستانیوں کے لیے ویزا کے حصول کو شفاف، محفوظ اور آسان بنانا ہے
