روزمرہ زندگی میں استعمال ہونے والی پیکٹ بند اور فاسٹ فوڈ اشیاء اب صرف سہولت نہیں بلکہ صحت کے لیے ایک سنجیدہ خطرہ بن چکی ہیں۔ ایک نئی تحقیق نے خبردار کیا ہے کہ الٹرا پراسیسڈ فوڈز کا زیادہ استعمال دل کی بیماریوں کے خطرے میں نمایاں اضافہ کر سکتا ہے۔
جے اے سی سی ایڈوانسس نامی جریدے میں شائع تحقیق میں بتایا گیا ہے کہ جیسے جیسے روزانہ کی خوراک میں پراسیسڈ فوڈ کی مقدار بڑھتی ہے، ویسے ویسے دل کے امراض کا خطرہ بھی بڑھتا جاتا ہے۔
تحقیق کے دوران امریکہ میں 6800 سے زائد افراد کا طویل عرصے تک جائزہ لیا گیا، جن میں مختلف نسلوں اور پس منظر کے لوگ شامل تھے۔ نتائج سے معلوم ہوا کہ جو افراد زیادہ مقدار میں پراسیسڈ فوڈ کھاتے ہیں، ان میں دل کے مسائل کا خطرہ تقریباً 67 فیصد زیادہ ہو جاتا ہے۔
ان خوراکوں میں چپس، برگر، پیزا، سفید ڈبل روٹی، میٹھے مشروبات اور کینڈی جیسی اشیاء شامل ہیں، جن میں نمک، چینی اور غیر صحت بخش چکنائی کی مقدار زیادہ ہوتی ہے۔ یہی اجزاء وقت کے ساتھ بلڈ پریشر، کولیسٹرول اور وزن میں اضافے کا سبب بنتے ہیں، جو دل کی بیماریوں کو جنم دیتے ہیں۔
ماہرین کے مطابق یہ صرف کھانے کے پراسیس ہونے کا مسئلہ نہیں بلکہ اس میں شامل مضر اجزاء اصل خطرہ ہیں، جو جسم میں سوزش پیدا کر کے خون کی نالیوں کو نقصان پہنچاتے ہیں۔
تحقیق میں یہ بھی سامنے آیا کہ کچھ کمیونٹیز میں یہ خطرہ مزید زیادہ ہوتا ہے، جس کی بڑی وجہ صحت مند خوراک تک محدود رسائی اور غیر متوازن غذائی ماحول ہے۔
ماہرین کا کہنا ہے کہ اگرچہ یہ خطرہ قابلِ توجہ ہے لیکن اسے کم کرنا ممکن ہے۔ تازہ سبزیاں، پھل، گھریلو کھانا اور متوازن غذا اپنانے سے دل کو محفوظ رکھا جا سکتا ہے۔
مختصر یہ کہ سہولت کے نام پر کھائی جانے والی یہ خوراک آہستہ آہستہ صحت کو نقصان پہنچا رہی ہے، اور وقت آ گیا ہے کہ کھانے کے انتخاب میں احتیاط کو ترجیح دی جائے۔
