ممبئی: بالی ووڈ اداکارہ اننیا پانڈے نے پاکستانی موسیقی سے اپنی پسندیدگی کا اظہار کرتے ہوئے پاکستان کے مقبول گانے ’الفاظ‘ کو اپنا دنیا کا سب سے پسندیدہ گانا قرار دے دیا ہے۔
بھارتی میڈیا رپورٹس کے مطابق اننیا پانڈے نے اپنے انسٹاگرام اکاؤنٹ پر ایک اسٹوری شیئر کی، جس میں ان کی ایک خوبصورت تصویر کے پس منظر میں پاکستانی گلوکاروں حمزہ ملک اور زین زوہیب کا گانا ’الفاظ‘ سنائی دے رہا تھا۔
اداکارہ نے اس تصویر کے ساتھ گانے کو اپنی پسندیدہ موسیقی قرار دیا اور لکھا کہ یہ میرا دنیا کا سب سے پسندیدہ گانا ہے۔
انہوں نے اس پیغام کے ساتھ سرخ دل کا ایموجی بھی شامل کیا، جس سے اس گانے کے لیے ان کی پسندیدگی کا اظہار ہوا۔ اننیا کی جانب سے پاکستانی گانے کا اس انداز میں انتخاب بھارتی اور پاکستانی موسیقی کے مداحوں کے لیے خاصی دلچسپی کا باعث بن گیا۔
گانا ’الفاظ‘ کس کا ہے اور اس میں کیا خاص بات ہے؟
پاکستانی گانا ’الفاظ‘ حمزہ ملک اور موسیقی کی جوڑی زین زوہیب کی مشترکہ پیشکش ہے، جس نے ریلیز کے بعد مختصر عرصے میں غیرمعمولی مقبولیت حاصل کی۔
یہ رومانوی طرز کا گانا ہے، جس میں اردو اور پنجابی زبان کے امتزاج کے ذریعے محبت، جذبات اور کسی خاص شخص کے لیے دل میں موجود احساسات کو بیان کیا گیا ہے۔ اس کی دھن، آوازوں کا امتزاج، رومانوی انداز اور پیشکش نے نوجوان سامعین میں اسے خاصا مقبول بنایا۔
یہ گانا جولائی 2026 میں ریلیز ہوا تھا اور دیکھتے ہی دیکھتے پاکستان سمیت دیگر ممالک میں بھی سامعین کی توجہ حاصل کرنے میں کامیاب رہا۔
گانے کی شاندار کامیابی
’الفاظ‘ کی مقبولیت صرف سوشل میڈیا تک محدود نہیں رہی بلکہ عالمی میوزک اسٹریمنگ پلیٹ فارم اسپاٹیفائی پر بھی اس گانے نے نمایاں کامیابیاں حاصل کیں۔ اسپاٹیفائی پر گانے کے 50 ملین سے زائد اسٹریمز رپورٹ کیے گئے۔
برطانیہ کے آفیشل ایشین میوزک چارٹ میں بھی گانے نے دوسری پوزیشن حاصل کی۔
گانے ’الفاظ‘ کے حوالے سے ایک اور اہم پیش رفت عالمی شہرت یافتہ برطانوی نژاد نارویجن میوزک پروڈیوسر اور ڈی جے ایلن واکر کی پاکستان آمد ہے۔
فیڈڈ اور آلون جیسے مقبول گانوں کے باعث دنیا بھر میں پہچانے جانے والے گلوکار ایلن واکر نے بھی پاکستانی گانے ’الفاظ‘ میں دلچسپی کا اظہار کیا۔
میڈیا رپورٹس کے مطابق ایلن واکر نے گانے کی میوزک ویڈیو پر سوشل میڈیا کے ذریعے ردعمل دیا، جس کے بعد ان کی اس گانے کے فنکاروں سے ملاقات اور ممکنہ موسیقی کے اشتراک کی خبریں سامنے آئیں۔
ایلن واکر نے اپنے آفیشل انسٹاگرام اکاؤنٹ پر ایک ویڈیو بھی شیئر کی، جس میں وہ لاہور کے تاریخی عالمگیری دروازے کے سامنے، حضوری باغ کی جانب، اپنے لوگو سے مزین لکڑی کا ایک باکس رکھتے دکھائی دیے۔
ان کی اس پوسٹ کے بعد مداحوں میں قیاس آرائیاں شروع ہوگئیں کہ شاید ایلن واکر پاکستانی گلوکاروں حمزہ ملک، زین اور زوہیب کے ساتھ اس گانے کا نیا ورژن تیار کرنے جا رہے ہیں۔
