کرکٹ کے شیدائیوں کو آئندہ سال سے ایک اور ’ٹی 20 لیگ‘ دیکھنےکو مل سکتی ہے۔ لیکن یہ ’ٹی-20 لیگ‘ ایک پرانے ٹورنامنٹ کی ہی نئی شکل ہوگی۔
بھارتی ویب سائیٹ ’دی کرکٹر‘ کے مطابق ’چمپئنز لیگ ٹی-20‘ آئندہ سال ’دی ورلڈ کلب چمپئن شپ‘ کے نام سے جانی جائے گی۔
اس ٹورنامنٹ کی خاص بات یہ ہوگی کہ اس میں وہ ٹیمیں کھیلیں گی جو دنیا کی باقی ٹی-20 لیگ، مثلاً آئی پی ایل، بی بی ایل، سی پی ایل، پی ایس ایل، ایس اے 20 اور دی ہنڈریڈ کی چمپئن ہوں گی۔ یعنی پی ایس ایل (پاکستان سپر لیگ) میں کھیلنے والے پاکستانی کھلاڑیوں کا بھارتی کھلاڑیوں سے آمنا سامنا بھی ہونے کا پورا امکان ہے۔
دی ورلڈ کلب چمپئن شپ سے متعلق ابھی حتمی فیصلہ ہونا باقی ہے۔ بی سی سی آئی اور ای سی بی کی اس ٹورنامنٹ کی منظوری کے لیے آئی سی سی چیئرمین جئے شاہ کے ساتھ بات چیت جاری ہے۔
امید کی جا رہی ہے کہ جلد ہی اس بات چیت کا کوئی مثبت نتیجہ سامنے آئے گا، اور ایک ایسے ٹورنامنٹ کو دیکھنے کا موقع ملے گا جس میں دنیا بھر کی ٹی-20 لیگ چیمپئن ٹیموں کا مقابلہ ہوگا۔
چمپئنز لیگ ٹی-20 کی شروعات پہلی مرتبہ 2009 میں کی گئی تھی۔ یہ ٹورنامنٹ 2014 تک کھیلا گیا، لیکن پھر اسپانسرشپ ملنے کی جھنجھٹ اور اس کی خراب ٹی آر پی کے سبب اسے بند کردیا گیا۔
